Siverth Amondsen KNAPK-mi pisortaagallartunngorpoq

Siverth Amondsen KNAPK-mi augustip naanissaata tungaanut pisortaagallartussanngortoq, KNAPK-mi siulittaasup Henrik Sandgreenip Sermitsiaq.AG-mut ilisimatitsissutigaa.

- KNAPK-mi suleriutsinut ingerlatsinermullu misilittagaqarluartuuvoq. Qularinngilluinnarpara pisortaagallartutut ataatsimeersuarnissap tungaanut suliassanik ingerlatsilluassasoq, ataatsimeersuarnerlu torersumik naammassineqarumaartoq, Henrik Sandgreen oqarpoq.

Siverth Amondsen, KNAPK-mi siusinnerusukkut siunnersortaasarlunilu pisortaagallartarsimasoq, Tønnes Berthelsen januarip naanerani pisortaajunnaartinneqartoq kingornalu soraarnermut tunngatillugu isumaqatigiissuteqartoq, taamaasilluni taarserpaa.

Ataatsimeersuarnissaq piareersarneqarpoq

KNAPK-mi ulluinnarni aqutsisut siulersuisuunernit pisinnaatinneqarlutik Siverth Amondsenimik atorfinitsitsipput.

Amondsenip allaffeqarfimmi aqutsineq augustip naanissaata tungaanut akisussaaffigissavaa, KNAPK uge 28-mi ataatsimeersuareerluni pisortassarsiornissaata tungaanut.

- Suliassarpassuit suli ingerlanneqartussaapput ataatsimeersuarnissap tungaanut. Aalisarneq piniarnerlu kisimik sammineqaannartanngillat. Aammali avatangiisit piujuaannartitsinerlu siunertaralugu aalisarneq aamma sammineqartorujussuanngornikuupput. Taakku allaffissornikkut suliassat ilaminiinnannguaraat pisortaagallartup maanna ingerlatassai, siulittaasoq oqarpoq.

Siulittaasup ilanngullugu oqaatigaa aalisarneq pillugu ataatsimiititaliarsuaq inuussutissarsiornerullu iluani ikiorsiissutinut innersuussutit piffissami kingullermi initungaatsiartut.

Siullermiilinngilaq

Siverth Amondsen KNAPK-mi ukiorpassuarni atorfeqartarsimavoq. Siullermik juulimi 1998-imi siunnersortitut atorfineqqaarpoq, aammali KNAPK-mi pisortaagallartarsimalluni.

Arlaleriarluni pisortaagallartarsimavoq paarlattaasarsimallunilu. Sermitsiaq.AG-mullu naatsukullammik oqaatigaa pisortaagallartutut issiavimmut inginnissani akunnattoorutigisimanagu.