Siusinaartumik utoqqalinersiaqalersinnaanermi unamminartut

Danmarkimi kalaallit najugaqartut kiisalu danskit Kalaallit Nunaanni sulisimasunut utoqqalinersiaqaliaarnissamut, Arne-pensionimik taaneqartartoq, ajornarsinnaavoq. Tamanna naammaginanngilaq, Aaja Chemnitz oqarpoq.

- Danskit naalakkersuisui Nunatsinnilu Naalakkersuisut suleqatigiillutik una aaqqinniartariaqarpaat, Aaja Chemnitz isumaqarpoq

Oqariarta 61-nik ukioqartutit, Danmarkimi najugaqarlutit ukiuni 44-nilu sulinikuullutit, 17-nik ukioqarlutilli sulinikuusutit. Ukiut qassit sulisimanerit uppernarsarneqarsinnaappat taamaappat 'Arne-pensioneqarlernissamut' pisinnaatitaaffeqarputit.

Taamali ajornanngitsiginngilaq.

Kalaaliuguit Danmarkimi najugaqarlutit, Kalaallit Nunaannilu inuusuttuuninni sulisartuusimallutit uppernarsaruminaassinnaavoq Kalaallit Nunaanni sulinikuusutit, tamanna danskit Kalaallit Nunaanni sulisimasut, Danmarkimullu uteqqissimasut, ajornartorsiutigaat.

Immikkut ittunik aaqqissuussisoqassanngitsoq

Folketingimi ilaasortap Aaja Chemnitzip (IA) suliffeqarnermut ministerimut Peter Hummelgaard-imut (S) ajornartorsiut apeqqutigaa. Sulisimanermik uppernarsaatit pissarsiarinissaat ajornakusoortinneqartarnera uppernarsarpaa.

Aamma suliamut tunngatillugu immikkut ittunik aaqqissuussinissamik danskit naalakkersuisui pilersaaruteqanngitsut nalunaarutigaa.

- Akissutigineqartoq naammaginanngilaq, iliuuseqarfigiumaneqanngilarmi, Aaja Chemnitz oqarpoq.

Kalaalerpassuit siusinaartumik utoqqalinersiaqalersinnaannginnerat oqaatigaa. Tassunga pissutaavoq sulisimanermut uppernarsaatit aaneqarsinnaaneq ajorput. GTO-p (Grønlands Tekniske Organisation, aaqq.) atorunnaarsimanera tassunga pissutaavoq, Aaja Chemnitz nassuiaavoq:

- Ukiut suliffigisimasat uppernarsarneqarsinnaannginneri, suliffigisimasallu atuukkunnaarsimaneri pissutaallutik siusinaartumik utoqqalinersiaqarsinnaannginneq ajornartorsiutaavoq annertooq.

Danskit naalakkersuisui Naalakkersuisullu

Arlaatigut paasissutissat aaneqarsinnaasut Aaja Chemnitzip qularinngilaa.

- Danskit naalakkersuisui Nunatsinnilu Naalakkersuisut suleqatigiillutik una aaqqinniartariaqarpaat, akivoq.

Naak Peter Hummelgaard kalaallinut immikkut aaqqiissutaasinnaasunik ujartuinissamik pilersaaruteqanngikkaluartoq, Aaja Chemnitzip oqaatigaa danskit naalakkersuisui aaqqiissutaasinnaasunik ujaasisalersimanerat. Maannakkulli atuuttoq iluarsineqartariaqartoq isumaqarpoq.

Siusinaartumik utoqqalinersiaqalersinnaasorpassuugaluit, Arne-pensionitut taallugu, Kalaallit Nunaanni sulisimanermik uppernarsaasinnaanngitsut pillugit Aaja Chemnitz ima oqarpoq:

- Isumaqarpunga uggornartuusoq.

Powered by Labrador CMS