Siusinaartumik pensionisiat pitsaanerusumik tunniunneqarsinnaanngussapput
Siusinaartumik pensionisiallit siunissami naalagaaffiup iluani allamut nuukkaagamik, kalaallit pensionisiaannit danskit pensionisiaannut ingerlaannartumik nuutsinneqarsinnaanngussapput
Folketingip inatsisissatut siunnersuut, siusinaartumik pensionisiallit naalagaaffiup iluani allamut nuukkaagamik ajornannginnerujussuarmik siusinaartumik pensionisisalersitsisartussaq siullermeerlugu suliarisimavaat.
Tassa siusinaartumik pensionisiarisartakkat nuuffigisami qaammatini aqqaneq-marlunni siullerni atuutiinnassapput. Tamatuma kingorna kalaallit siusinaartumik pensionisiaannit danskit siusinaartumik pensionisiaannut ingerlaannartumik nuussisoqartassaaq, tassa piffissaq sivisooq atorlugu sullinneqaqqaanngikkaluarluni.
Aaja Chemnitz Larsenip (IA) siunnersuut akuersaarpaa.
- Pitsaalluinnartutut isigaarput, inuit 25-t ullumikkut Kalaallit Nunaanni siusinaartumik pensionisisartut, ukiumut Kalaallit Nunaannit Danmarkimut nuuttartut ikiorserneqarsinnaalernerat, siunnersuut oqallisigineqarmat oqarpoq.
Amerlanerussuteqartunit taperserneqartoq
Siunnersuut ataatsimiititaliami maanna suliarineqartoq amerlanerussuteqartunit taperserneqarpoq.
Inatsisissatut siunnersuut pingasunik immikkoortortaqarpoq
- Tassani pineqarput nunat naalagaaffeqatigiit akornanni suliat pillugit paasissutissanik sukkanerusumik tunniussisinnaanissaq, nooreernermi qaammatit aqqaneq-marluk angullugit siusinaartumik pensionisiaqaannartarnissaq kiisalu Savalimmiuni Kalaallillu Nunaanni qaffasinerpaamik siusinaartumik pensionisiaqartarnermit danskit siusinaartumik pensionisiaannut ingerlaannartumik nuussisarnissaq (qinnuteqaqqaanngikkaluarluni aammaq sulisinnaassutsimik naliliiffigineqaqqaanngikkaluarluni) aamma Danmarkimi siusinaartumik pensionisiaannit Savalimmiuni Kalaallillu Nunaanni qaffasinnerpaamik siusinaartumik pensionisiannut ingerlaannartumik nuussisarnissaq, beskæftigelsesministeri Peter Hummelgaard Thomsen (S) saqqummiussissummini allappoq.
- Isumaginninnikkut ikiorsiissutinut tamanna aamma atuuttariaqaraluartoq
Aaja Chemnitz Larsen (IA) isumaqarpoq, Kalaallit Nunaanni pisortat ikiorsiissutaannit Danmarkimi aningaasanngorlugit ikiorsiissutinut ikaarsaariarnermi maleruaqqusat taama ittut aamma atuutsinneqartariaqaraluartut.
Københavnimi Kalaallit Illuata siorna misissuisimanerata takutippaa, kalaallit atugarliornerpaat amerlanersaat tikikkaagamik pisortanit ikiorserneqarneq ajortut. Danskit aaqqissugaanerat paasisaqarfigissallugu ajornartorsiutigisarpaat. Peqatigitillugu uppernarsaatit pisariaqartinneqartut pissarsiariniarnerat amerlasuutigut ajornartittarpaat
- Inuttut atugarliortutut piffissami siullermi Danmarkimiinneq ajornarnerpaasarpoq, tamatumalu nalaani inuuniarnikkut aningaasaqarnikkullu nakkaattut amerlanerpaasarlutik, Aaja Chemnitz Larsen (IA) oqarpoq.