Siunnersuut: Najugaqarfinni 25-ni annerpaamik ulloq unnuarlu paaqqinnittarfik ataaseq
Sumiiffimmi inissiani 25-nik inissiaqartumi annerpaamik ataatsimik ulloq unnuarlu paaqqinnittarfimmik peqarsinnaassaaq, paaqqinnittarfiillu allaffissornikkut akuerineqarsinnaassapput, Kommuneqarfik Sermersuumi aqutsiveqarfik siunnersuuteqarpoq.
Meeqqanut inuusuttunullu ulloq unnuarlu paaqqinnittarfinnik inissiiniarneq ajornakusoorsinnaasarpoq. Assersuutigalugu Nuummi Kangillinnguani ulloq unnuarlu paaqqinnittarfissaq pillugu siunnersuut tusarniaasoqarnerani sanilerisanit annertuumik apeqqusersorneqarpoq, tamannalu paaqqinnittarfimmik pilersitsinissamut itigartitsinermik kinguneqarpoq.
Illoqarfiit pingaarnersaata kommunia maanna ulloq unnuarlu paaqqinnittarfiit akuerineqartarnerinut inatsisinik nutaanik suliaqarpoq.
Kommuneqarfik Sermersooq ulloq unnuarlu paaqqinnittarfimmik pilersitsiniarluni qinnuteqaatinik amerlasuunik pisarpoq – pingaartumik Nuummi. Tassanilu ulloq unnuarlu paaqqinnittarfik najugaqarfimmi pilersinneqassasoq qinnuteqaatigineqartarpoq, kommunillu sanilerisanut tusarniaanerup kingorna akuersinissaanik tamanna pisariaqartitsiffiusarpoq.
Inissiaqarfiit ilusiligaanertik attatissagaat
Kommunimi ingerlatsivik sukkanerusumik sulianik suliarinniffiusussamik aamma illoqarfinni ulloq unnuarlu paaqqinnittarfiit agguataarneqarnissaannut pitsaanerulersitsisussamik siunnersuuteqarpoq.
Siunnersuummi qulequttat pingaarnerit tassaapput, tassa inissiaqarfinni 25-ni ataatsimik ulloq unnuarlu paaqqinnittarfeqarsinnaaneranik najoqqutaq malillugu suliaqartoqartassaaq.
- Taamaaliornikkut najugaqarfiit ilusiligaanermikkut allanngortinneqannginnissaat qulakkeerneqassaaq. Taamaalilluni atuinermik allanngortitsinissamik qinnuteqaat suliarineqarnissaa sioqqullugu, matuma siuliinut tunngasut eqqarsaatigalugit tamanullu tusarniutigineqarnissaa sioqqullugu sumiiffimmi paaqqinniffiit qassiuneri misissorneqaqqaassaaq, kommunimi ingerlatsivik allappoq.
Sumiiffiit marluk taaneqartut
Taamatut ingerlariuseqarnerup kingunerissavaa, sumiiffiit Iiminaq aamma Nigerleq ulloq unnuarlu paaqqinniffinnik marlunnik aamma pingasunik peqarsinnaanerat, ingerlatsivik nangilluni allappoq.
Ingerlatsivimmit siunnersuutigineqarpoq, qinnuteqaatit politikikkut suliarisarunnaarlugit qinnuteqaatit allat assigalugit suliarineqartassasut.
Kommunimi ataatsimiititaliami politikerit malittarisassanut siunnersuutit akuerissappatigik tusarniutigineqassapput.
