Siunnersuut: Meeqqat timersornerannut nunani avannarlerni suleqatigiinneruneq
Nunat Avannarliit Killiit Siunnersuisoqatigiiffiata Savalimmiuni, Kalaallit Nunaanni aamma Islandimi Naalakkersuisut nunat akornanni sammisami timersornermut tunngasumi suleqatigiinnerup annertusarneqarsinnaaneranik mississueqqullugit kaammattorpai
Timersortartut nunanut avannarlernut unammiartornerusalersinnaapput.
Nunat avannarliit killiit imminnut qaninnerulersinniarlugit timersornerup iluani suleqatigiinnermik aaqqissuussaasumik pilersitsinissamik siunnersuuteqarpoq, Kalaallit Nunaanni Savalimmiunilu niviarsiaqqat nukappiaqqallu Islandimi pisartanngorniunnermut peqataatissinnaallugit immaqaluunniit nunat taakku pingasut paarlakaajaallutik Nunani Avannarlerni Killerni timersornikkut pissartanngorniutsitsinernik aaqqissuussisinnaallutik.
Siunnersuut Inatsisartuni maajip qulingiluaani eqqartorneqassaaq.
Angalanermut aningaasartuutit
Islandimi meeqqat atuarfianni niviarsiaqqanut nukappiaqqanullu nukarliunerusunut pissartanngorniutsitsinerit arlallit ingerlanneqartarput; ukiuunerani basketballimi assammillu arsarnermi aasakkullu isikkamik arsarnermi.
Unammiuaartitsinerit ilaat 1000 sinnerlugit amerlassusilinnit peqataaffigineqartarput, angajoqqaat ikiortillu amerlasuut nunami sumi tamaani aaqqissuussiffiusunut illersukkaminnut tapersersuillutik malinnaasarlutik. Unammiuaartitsinerit tamakku soqutigineqartaqaat, tamanna unammisut niviarsiaraanerat nukappiaraaneralluunniit apeqqutaatinnagu.
- Angalanernut NATA ((North Atlantic Tourism Association) qinnuteqarfigineqarsinnaavoq, taanna timersorianut aamma aningaaliissuteqartarpoq, siunnersuummi allaqqavoq.
Siunissamut iluaqutaasussat
Islandip kingullertigut timersornikkut iluatsitsinera avannaata kitaani nunat allat aamma alloriarfittut atorluarsinnaagaat oqaatigineqarpoq.
- Aamma attaveqatigiissaagaanikkut, ilinniartitaanikkut atortorissaarutitigullu misilittakkanik ingerlatsinermilu iluatsitanik avitseqatigiinnikkut nunat avannarliit killiit sammisami siumut isigisumik pitsaanerusunik angusaqartalersinnaapput, siunnersuummi atuarneqarsinnaavoq.