Siunnersuutit millioninik hunnorujulikkaanik nalillit
Inatsisartut siunnersuutinik katillugit 205,9 millioner koruuninik nalilinnik ukiakkut ataatsimiinnermi suliarineqartussanik tunniussisimapput. Aappaagumut aningaasanut inatsisissatut siunnersuutip siullermeerlugu ullumi suliarineqarnissaa sioqqullugu Aningaasaqarnermut Naalakkersuisoq ilisimatitsivoq.
Ullumi 2021-mut Aningaasanut Inatsisissatut siunnersuut Inatsisartut ataatsimiittarfianni oqaluuserineqarlunilu siullermeerlugu suliarineqassaaq. Tassunga atatillugu Aningaasaqarnermut Naalakkersuisup Vittus Qujaukitsup, saqqummiussissutip suliarineqarsimanera siunnersuummut nassuiaatitalerlugu saqqummiuppaa.
Vittus Qujaukitsoq Naalakkersuisullu Siliuttaasuat Kim Kielsen ukiakkut ataatsimiinnermi siunnersuutinik aningaasartuutaavallaanngitsunik saqqummiussisoqarnissaanik piumasaqarsimapput.
Illuatungiliuttut akisussaassuseqartumik aningaasaqarnikkut ingerlatsisoqarnissaanik piumasaqarsimapput, Aningaasaqarnermullu Ataatsimiititaliap aningaasanut inatsisissatut siunnersuummik itigartitsereersimapput, tassa 183,3 millioner koruuninik amigartooruteqartoqarnissaanik anguniagaqartoqarnera pissutigalugu.
Partiit tamarmik akisussaassuseqartumik aningaasaqarnikkut ingerlatsisoqarnissaanik isumaqatigiikkaluartut, siunnersuutit ukiakkut ataatsimiinnermi suliarineqartussatut tunniunneqarsimasut 200 millioner koruunit sinnerlugit naleqarput.
Siunnersuutit 14 procentii Naalakkersuisunit tunniunneqarsimasut
Aningaasalli tamarmik aappaagu nassaarineqartussaanngitsut, Vittus Qujaukitsup allakkiaani atuarneqarsinnaavoq.
- Paatsuungasoqaqqunagu Naalakkersuisuniit erseqqissarneqassaaq ukiakkut ataatsimiinnissamut aalajangiiffigisassatut siunnersuutit suliarineqarneranni, siunnersuuteqartut paasissutissiinerat tunngavigalugu aningaasartuutissatut ilimagineqartut katillugit 205,9 millioner koruuniummata, taakkunanngalu 72,1 millioner koruunit 2021-mut tunngasuummata.
Allakkiaq naapertorlugu, siunnersuutit amerlanersaat partiinit assiginngitsunit tunniunneqarsimapput, Naalakkersuisut mianersornerusimallutik.
- Siunnersuutit 86%-ii ilaasortanit partiinillu saqqummiunneqarput. Siunnersuutit 14%-ii Naalakkersuisut siunnersuutaannit aallaaveqarlutik.
Siunnersuutit aningaasalersorneqarnissaannut siunnersuutitaqanngitsut
Inuiaqatigiinni pitsanngorsaataasussat pillugit siunnersuutit saqqummiunneqartut ajornartorsiutaanngillat, unammillernartuali tassaavoq siunnersuutit aningaasalersorneqarnissaannut siunnersuutitaqannginnerat.
- Aalajangiiffigisassatut siunnersuutit aningaasalersorneqarnissaannut siunnersuutinik saqqummiussisoqanngilaq. Ilaat qularnanngitsumik allaffissornikkut sinaakkutaareersut iluanni ingerlanneqarsinnaapput, taamaalillutillu aningaasartuuteqarnerunermik kinguneqartitsissanatik. Allat akuersissutigineqassagunik aningaasartuuteqarnerunermik nassataqassapput.
Aningaasaqarnermut Akileraartarnermullu Ataatsimiititaliap kissaatigisaatut, 2021-mut aningaasanut inatsisissaq, aningasaanut inatsisiliorfiusumi tamarmiusumi 2021-2024-mi amigartooruteqartussaanngitsoq akuerineqassappat, aningaasanut inatsiseqarfiusumi tamarmiusumi 175 millioner koruuninik aningaasartaqartumik missingersuutit pitsanngortinnissaat pisariaqassaaq.
Tassa ukiakkut ataatsimiinnermi siunnersuutinit suliarineqartussatut saqqummiunneqareersunit 175 millioner koruuninik atuinikinnerusoqartariaqarpoq.
- Pissutsit maannakkutut isikkoqartillugit pisortat amerlanerusunik aningaasaliinerat aaqqissuussaanikkut ajornartorsiutitsinnut, imaluunniit ajornartorsiutinut sivikinnerusumik atuuttussanut aaqqiissutaasinnaannginnerat tamatta nassuerutigisariaqarparput. Namminersortut namminerlu piumassutsiminnik suliniartut suliniutaat kikkunnit tamanit maligassiuinertut nersortariaqartutullu isigineqartariaqarput, Aningaasaqarnermut Naalakkersuisoq Finanser Vittus Qujaukitsoq oqarpoq.