Siunnersuut: Aatsitassarsiorfinni uulia kinertoq atorneqartassanngilaq

Uuliap kinertup (HFO) atorneqarneranut inerteqqut aatsitassarsiornernut tamanut atuutilersinneqassaaq.

Aatsitassanik Suliassaqarfinnut Avatangiisinut aqutsisoqarfiup Aatsitassarsiornermi avatangiisit pillugit 2019-2023-mut malittarisassanut siunnersuutaani, tusarniaassutigineqartumi tamanna atuarneqarsinnaavoq.

- Nunami immamilu aatsitassarsiornerni tamani uuliap kinertup (HFO) atorneqannginnissaa assartorneqannginnissaalu, periusissiamut siunnersuummi tamanna allaqqavoq.

Uuliasiortitseqatigiiffiit HFO-mik atuinissaannut inerteqquteqareerpoq, kisianni maanna aatsitassarsiornernut tamanut atuutilersinneqarnissaa kissaatigineqarpoq.

Uuliap kinertup issittup imartaani sunnertiasumi uuliakoornissaata ernumassutigineqarnera siunnersuuteqarnermut tunuliaqutaavoq. Tamatuma saniatigut ikummatissanit allanit mingutitsinerujussuusarpoq.

Ilisimatuussutsikkut peqqussutit

Periusissatut allakkiaq Pinngortitaleriffimmi aamma Dansk Center for Miljø og Energi (DCE) Aarhus Universitetimit ilisimatuussutsikkut peqqussutsinik tunngaveqarpoq.

- Uuliamik kinertumik (HFO)-mik atuineq arlalinnik tunngaveqartumik avatangiisinut ajorluinnartuuvoq. Dieselimit aamma ikummatissanit allanit silaannarmik mingutsitsinerusumik aniatitsisarpoq, imaanullu kuutsinneqaruni salikkuminaatsorujussuuvoq, ilisimasallit peqqussummi taama allapput.

- Tamakku tunngavigalugit HFO Qalasersuaq Kujallermi atorneqaqqusaanngilaq aamma assartorneqarsinnaanngilaq. Nunani tamalaani umiartornermut kattuffiup (IMO) Issittumi inerteqquteqalernissamut tassunga assingusumik sulissuteqarpoq, maannakkullu HFO-mik tassani atuinnginnissamik imaluunniit assartuinnginnissamik kajumissaaruteqareerpoq. Uuliasiortitseqatigiiffiit Kalaallit Nunaanni imaani uuliamik ujaasisut HFO-mik maanna tikillugu atueqqusaanngillat.

Pinngortitaleriffimmi aamma DCE-mi ilisimatuut aamma peqqussutigaat, Kalaallit Nunaata Issittumi HFO-p sukkulluunniit atorneqannginnissaa sulissutigissagaa.