naalagaaffeqatigiinneq
Siunnersuut: Qallunaat kommunii aamma Kalaallit Nunaat pillugu erfalasulertariaqarput
Kalaallit Nunaanni aamma Savalimmiuni inuiaqatigiit ullorsiorfiini erfalasulerneq naalagaaffiup kisimi malittariaqanngilaa - Danskit kommunii aamma taamaaliortariaqarput, DF-imi politikeri taama isumaqarpoq
Danmarkip rådhusiini 98-iusuni kalaallit erfalasuat, Erfalasorput, inuiattut ullorsiortoqarnerani erfalatinneqartariaqarpoq.
Dragørimi kommunalbestyrelsimi Dansk Folkepartimeersoq, Morten Dreyer isumaqarpoq.
Najukkami politikeri taamaalilluni 'flagstang-gate'-imik taagorneqartumut ilannguppoq, tassani Løkkep naalakkersuisoqarfiata naalagaaffeqatigiinnerup pingaartinneqarnerata nukittorsarneqarnissaanut iliuuseqartoqarpoq.
Isumassarsiatsialak
- Uagut Danmarkimi Kalaallit Nunaata aamma Savalimmiut erfalasui inuiattut ullorsiortoqarnerani nalliuttorsiutigalugu amoortalissagipput isumassarsiaavoq, taanna pisassaaq ulluni juunip 21-ani aamma apriilip 25-ani, Morten Dreyer allattarfimmini Kommunernes Landsforeningimi allappoq.
Uani atuaruk Danske Kommuner: Kommunerne bør flage for Grønland og Færøerne
- Uagutsinnut naalagaaffeqatigiinnermik pingaartitsisunut tamanna isumassarsiatsialaavoq. Taamaattumillu siunnersuutigerusuppara, aamma uagut kommunini naalagaaffeqatigiinneq nersorniartassagipput, kommunit rådhusiisa pisortatigoortumik erfalasulerfiitigut erfalasoq amoorlugu.
Kalaallit politikeriisa qallunaat naalakkersuisuisa siunnersuutaa nipaatsumik qisuariarfigaat.
Alloriarneq siulleq
Ataasiakkaat, soorlu Aaja Chemnitz Larsen (IA), qallunaanit ajunngitsuliorneq akuersaarpaat, kisiannili Lars Løkke Rasmussenip (V) naalakkersuisuisalun politikkikkut sulinermini Kalaallit Nunaannut nukissanik atuinerussasoq neriuutigalugu ilanngullugu oqaatigaa.
Atuaruk: Aaja: Løkkep erfalasulerniartalernera politikkimik takutitsineruvoq
Morten Dreyerilli (DF) nassuerutigaa, siunnersuut takussutissiaannaanerusoq.
- Soorunami erfalasumik ajunngisaarneq annikitsuuvoq. Kisianni naalagaaffeqatigiinnermut ukkassinissamut aallartisaataavoq. Isumaga naapertorlugu immitsinnut pinngitsoorsinnaanngilagut, taanna allappoq.