Siunnersuut isornartorsiorneqarsimaqisoq unitsikkallarneqarpoq
Peqqissutsimut Naalakkersuisoqarfik tusarniaanerup nalaani tusarniummut akissutinik 20-nik tigusaqarpoq. Tusarniummut akissutini oqariartuutigineqartut aallaavigalugit Naalakkersuisup siunnersuummut suliaq unitsikkallarpaa.
Inuit pisinnaatitaaffinik suliaqartut pingasut pisinnaatitaaffiillu pillugit siunnersuisoqarfiit marluk ataatsimoortilernissaanut siunnersuut oqallitsitsingaatsiarpoq. Peqqissutsimut naalakkersuisoq, Anna Wangenheimip tusarniummut akissutit 20-t atuareerlugit siunnersuutip suliarineqarnera unitsikkallarlugu maanna nalunaaruteqarpoq.
MIO, Tilioq, Utoqqaat Illersuisuat, Naligiissitaanermut siunnersuisoqatigiit aamma Kalaallit Nunaannit inuit pisinnaatitaaffii pillugit siunnersuisoqatigiit ataatsimoortilernissaannut, Inuit Pisinnaatitaaffii pillugit Kommissionimik taallugu, siunnersuut ukiakkut 2021-mi Inatsisartunut siunnersuutitut saqqummiunneqartussaagaluarpoq, 1. juli 2022-mi atuutilertussanngorlugu.
Naalakkersuisoqarfik ilisimatitsivoq Inatsisartut ukiakkut ataatsimiilerpata naatsorsuutigineqassanngikkallartoq siunnersuut oqaluuserisassani ilanngunneqarnissaa.
Siunnersuut saqqummiunneqaqqaarmalli arlalinnit isornartorsiorneqarsimavoq. Naalakkersuisoqarfillu tusarniummut akissutinik 20-nik tigusaqarsimalluni.
- Tusarniaanermi akissuterpassuit atuarpakka, taakkunani suleqatigisartakkatta arlallit kissaatigaat siunnersuutip imarisaanut sunniuteqarsinnaanerunissartik, matuma ataani inuit pisinnaatitaaffii pillugit isumalioqatigiissitap ilusilersorneqarneranut sulineranullu. Tamanna soorunami tusarnaarusuppara, Anna Wangenheim (D) oqarpoq.
Tulluarsaanissaq pisariaqartoq
Wangenheimip pisariaqarluinnartutut nalilerpaa tusarniummut akissutini saqqummiunneqartut aallaavigalugit siunnersuutip tulluarsarnissaanut piffissap naammattup atornissaa. Siunnersuut tulluarsareerlugu Inatsisartunut qaqugu saqqummiunneqassanersoq oqaatigineqanngikkallarpoq.
- Tamatuma saniatigut illuatungerisat attuumassuteqartut tamarmik siunnersuutip tulluarsarneqarneranut peqataanissamut neqeroorfigineqassapput, taamaasillunga qulakkeersinnaassagakku, siunnersuut inuit pisinnaatitaaffii pillugit suliassaqarfimmut iluaqutaasunik tamanik sunniuteqarfiussasoq kiisalu politikkikkut siammasissumik tapersersorneqassasoq.
Siunnersuummik suliaqarneq nanginneqarmat Naalakkersuisut nalunaaruteqaqqissapput.