Siunnersuut: Danmarkip nunanut allanut politikkimini Issittoq samminerusariaqarpaa

Danmark nunanut allanut politikkimik siusinnerusumit ´soqutigisanut samminninnerusumik´ ingerlatsilertariaqarpoq, tamatumani qanittumi soqutigisavut samminerulerlugit, nunarsuarmilu sumiiffinni allani qallunaat soqutigisaannut pingaaruteqannginnerusut tunulliullugit.

Politiken tirsdag naapertorlugu taamatut oqarpoq ambassadør Peter Taksøe-Jensen, qallunaat nunanut allanut politikkiat qaammatini sisamani qulaajarniareersimallugu, suliassarlu tamanna ministeriunermit Lars Løkke Rasmussenimit (V) suliassiissutigineqarsimavoq, siunissami isumannaatsuunermut, niuernermut ineriartornermullu politikkimut siunnerfiginiagassanut isummersorneqarumalluni.

Qallunaat soqutigisaat

– Qanimut soqutigisavut samminiarnerussavagut, immaqalu nunarsuup ilaani ungasissumi pisut, qallunaat soqutigisaannut toqqaannartumik pingaaruteqanngitsut, sunnerniarunnaarlutigit. Tamatumani ilanngullugit qallunaat niuernikkut inuussutissarsiornikkullu soqutigisaat. Siunnersuutigerusuppara pilersaarusiornikkut nunarsuarmillu sunik samminninnissamut nutaamik periusiortoqassasoq, Taksøe-Jensen Politikenimut oqarpoq.

Nalunaajaatit nutaat

Ukiorpassuarmi diplomatiusimasoq qulaajaanini suli naammassinngikkaluarlugu, marlunngornermi nunanut allanut politikki pillugu isumasioqatigiinnissaq sioqqullugu, sammilertariaqakkanik nutaanik nalunaajaateqarpoq.

Issittoq

Taassuma Poliikenimi apersorneqarnermini oqaatigaa Danmarkip Issittumik samminninnini pingaarnerulersittariaqaraa. Tamaani Dannmark, Rusland Canadalu Issittup ilaanik piginnittuunissamik piumasaqaataat imminnut qaleriiaarput, tamannalu pissutigalugu ilaatigut nunanut allanut ministeriusimasup Uffe Ellemann-Jensenip (V) Danmarkip Issittumik sammisaqarnerulernissaa ujartorsimavaa. Tamassumalu piviusunngornissaa ilimanarluinnalerpoq.

Pissaanilissuuvugut

– Danmarki Kalaallillu Nunaat naalagaaffeqatigiillu Issittumi pissaanilissuupput. Issittumi ineriartornerup qallunaat soqutigisaannut naapertuuttuunissaa qulakkeerniarlugu nukiit amerlanerusut atortariaqarpavut. Taamaattumik siunnersuumma ilagissavaat tamassuma sammineqarnerata suli pingaarnerutinneqalersinnaasoq, Taksøe-Jensen Politikenimut oqarpoq.

Tunulliussilluni

Akerlianik peqataaffigisat allat tunulliuttariaqarput. Peter Taksøe-Jensenip ilaatigut isornartoqartippaa Israelip Palæstinallu akornanni aaqqiagiinnginnermi Danmarkip akuleruteqataanera.

– Periusersoriaaseq eqqarsaatigalugu ilimananngilaq Danmark tamatumunnga akulerussimasuni israelimiut palæstinamiullu eqqisseqatigiinnissamik isumaqatigiissutaanik atsiortitsisuusinnaassasoq. Tassa sumiiffiit ilagaat, isumaga malillugu annikinnerusumik akuleruffiginiagassavut, taanna Politikenimut oqarpoq.

Nunanut siuarsagassanut ikiuutit allanngortillugit

Aamma qallunaat nunanut siuarsagassanut ikiuutitut tunniuttagai nutarterneqartariaqartut oqaatigaa. Sunniuteqarnerussagaluarput inuinnaat aningaasaataat, soraarnerussutisiaqalernissamut aningaaasaateqarfiit allallu peqataasuuppata, tamannalu peqatigalugu Peter Taksøe-Jensenip oqarneratut ´nunat siuarsagassat ilaasa, qallunaat siuarsaanermik sulissuteqarfigisimasaaasa, sammisaqarfigiunnaarlugit´.