Siunnersuisoqatigiit: Siusinaartumik soraarnerussutisialinnut pilersuisussaatitaaneq peerneqarli

Inuit Pisinnaatitaaffii pillugit Siunnersuisoqatigiinni ilaasortap, Hans Reimerip Tiliup innuttaasut saaffiginnissimasut saaffiginnissutaannik misissueqqissaarneranut nalunaarutaanik, "Periarfissat assigiit"-nnik soqutiginnilluni atuarsimavoq.

Siunnersuisoqatigiinni ilaasortap maluginiarpaa Tiliumut saaffiginnittut saaffiginnissutigikkajugaanni pingajuattut inissisimasoq tassaasoq siusinaartumik soraarnerussutisianut aamma soraarnerussutisianut tunngassuteqartut.

Saaffiginnissutini 249-suni 21-it taakkununnga tunngassuteqarput, tassa ukiup ataatsip ingerlanerani saaffiginnissutit 8 procentii tamassumunnga tunngassuteqarlutik.

Siusinaartumik soraarnerussutisiat pillugit saaffiginnissuteqarnermi kommunimi sullissinerup kigaappallaarnera, pisortaniillu pisartagaqalernissamut utaqqingaatsiartarneq saaffiginnissutigineqakkajupput.

Pilersuisussaatitaaneq killiliisarpoq

Aammali aapparisamik pisartagalimmik pilersuisussaatitaaneq Tiliumut saaffiginnittut ajornartorsiutigisarpaat:

- Taakkua saniatigut saaffiginnissutigineqartut tassaasarput innuttaasut pisartakkamik annertussusiat qanoq aalajangerneqarsimanersoq iluamik paasitinneqarsimanngitsut imaluunniit sooq piginnaanngorsaqqinneqassanerlutik saaffiginnittut. Tassaniipput aamma saaffiginnissutit pilersuisussaatitaanermut tunngasut arlallit, Tiliup nalilersuinermit nalunaarusiaani allassimavoq.

Pilersuisussaatitaaneq tassaavoq inatsimmi allassimasoq, siusinaarluni soraarnerussutisiaqarnermi pisartakkat aapparisap isertitai tunngavigalugit amerlassusilerneqartarnerat.

Pilersuisussaatitaaneq atorunnaarsinneqarli

Inuit Pisinnaatitaaffii pillugit Siunnersuisoqatigiinni ilaasortap tusagassiorfinnut nalunaarutimini pilersuisussaatitaanerup atorunnaarsinneqarnissaa piumasaraa.

- Tiliumiit naalakkersuisunut siornatigut innersuussutigineqarnikuuvoq pilersuisussaatitaaneq atorunnaarsinneqartariaqartoq, taamaasilluni inuk innarluutilik aapparisami isertaanik isumalluuteqarunnaarniassammat. Tamannalu tapersersornarpoq isumaqatigaarpullu. Aamma Naalagaaffiit peqatigiit inuit innarluutillit pisinnaatitaaffii pillugit isumaqatigiissummi inuk innarluutilik namminerisamik inuuneqarnissaminut pisinnaatitaaffeqarmat, Hans Reimer allappoq.

Taassuma maluginiarpaa inuit innarluutillit isertitamikkut ajornerusumik inissikkusunnatik aapparisaminnut nuussinnaannginnertik pillugu Tiliumut saaffiginnittartut.

- Arnaq innarluutilik aappanilu ineqatigiilerusupput, taanna aamma siusinaarluni soraarnerussutisiaqarpoq. Arnaq siusinaarluni soraarnerussutisiami saniatigut aningaasarsiulaartarnini pissutigalugu nalornivoq, nalugamiuk ineqatigiilerunik aappami siusinaarluni soraarnerussutisiai appassanersut, Tilioq nalilersuinermini oqaluttuarpoq.

- Nunatsinni ilaqutariinneq pingaaruteqarpoq, pilersuisussaatitaanerlu isumalluutigineqaleraangat aningaasaqarniarnikkut eqquinerluttaqaaq, Hans Reimer isumaqarpoq.

Hans Reimerip aamma ernummatigaa kommunimit pisartagassanik sullissinerup kigaannerata kingunerisaanik inuit innarluutillit ilaat akiitsoqarujussualersinnaasartut, allaallu angerlarsimaffeerussinnaasartut.