Siunnersuisoqatigiit: Naammagittaalliortarfeqarnikkut arnat pisinnaaritaaffii pitsanngorsaaffigineqarsinnaapput
Kalaallit Nunaat naammagittaalliortarfimmik, suiaassutsit tunngavigalugit assigiinngissitsisarnernik suliaqarsinnaasumik pilersitsisariaqarpoq. Inuit Pisinnaatitaaffii pillugit lnstitutsip aamma Kalaallit Nunaanni Inuit pisinnaatitaaffii pillugit Siunnersuisoqatigiit siunnersuutaasa tamanna ilagaat.
Inuit Pisinnaatitaaffii pillugit lnstitutsip Danmarkimi Kalaallillu Nunaanni arnat pisinnaatitaaffiisa qanoq innerat misissorsimavaa.
Insituti Kalaallit Nunaanni Inuit pisinnaatitaaffii pillugit Siunnersuisoqatigiit suleqatigalugit, Danmarkimi arnat pisinnaatiaaffiisa qanoq pitsanngorsaaffigineqarsinnaanerannut tunngatillugit Naalakkersuisunut arlalinnik inassuteqaateqarsimavoq.
Qitiusumik siunnertuusitigineqartut ilagaat, naammagittaalliortarfimmik pilersitsisoqarnissaa, suiaassuseq tunngavigalugu assigiissinneqanngitsutut misigisimagaanni naammagittaalliorfigineqarsinnaasumik.
Arnanut persuttaasarneq isigineqarnerussasoq
Nalunaarusiami erseqqissaassutigineqarpoq, suiaassuseq tunngavigalugu immikkoortitsisoqarsimaneranik sulianik qaqitsinissaq ajornannginnerulissasoq, maannakkummi eqqartuussiviit aqqutigalugit imaluunniit Inatsisartut Ombudsmandiannut naammagittaalliuuteqarnikkut, suliassat aatsaat suliarineqarsinnaasarput.
Aamma inassutigineqarpoq, qanigisani arnanut persuttaasarneq pillugu paasissutissanik misissuisimanernillu katersuisarnermik Kalaallit Nunaanni pitsanngorsaasoqassasoq.
Tassunga atatillugu inuit pisinnaatitaaffiinik suliniaqatigiiffiit taakku marluk oqaatigaat, Kalaallit Nunaanni persuttaasoqartaqisoq, 2019-imi inunnit 1000-iusunit 17-it persuttagaasimapput. Danmarkimi 1000-iugaangata pingasuusarput Savalimmiunilu 1000-iugaangata 1,3-iusarlutik.
Naartuersittartut amerlavallaarnerat misissorneqartariqartoq
Kalaallilli Nunaanni persuttaasarnerit pillugit politiit naatsorsuutaanni suiaassutsit immikkoortillugit allattuisoqartanngilaq, ajornatorsiutip ineriartorneranut malinnaaniaraanni immikkoortillugit allattortalernissaa siunertamut naapertuutissagaluarpoq.
Nalunaarusiami aamma inassutigineqarpoq, Kalaallit Nunaanni arnanik politikkerinik immikkoortitsisarnerup aamma sooq arnat taamak amerlatigisut naartuersittarnersut misissorneqarnissaannut, Naalakkersuisut aningaasanik immikkoortitsissasut.
Danmarkip FN-p Arnat pillugit Isumaqatigiissutaanut tunngatillugu misilitsinnerata ilaatut inassuteqaateqartoqarpoq.