Siunnersuisoqatigiit: Naalagiarnerit nutserneqartassanngillat
Danskit naalakkersuisuisa inatsisitigut piumasaqaatinngortissallugu siunnersuutiginiarpaat Danamrkimi naalagiarnerit qallunaatuumiit oqaatsinut allanut nutserneqartalersittussanngorlugit. Danskilli ilagiivisa siunnersuisoqatigiivi isumaqarput tamanna isumassarsiatsialaanngitsoq.
Qallunaatut naalagiarnerit oqaatsinut allanut nutserneqartartussanngorlugit inatsisissatut siunnersuut akuersissutigineqassappat, tamanna isumaqassaaq Danmarkimi toqqaannartumik kalaallisut oqaaseqarluni naalagiarnerit atorunnaarsinneqassasut.
Danmarkimi Ilagiit siunnersuisoqatigiivili siunnersuummut isumaqataanngillat. Taamaammat ministeriunermut Mette Frederiksenimut aamma kirkeministerimut Joy Mogensenimut allakkanik ammasunik nassiussaqarput illuatungiliinertik tusartikkumallugu.
Upperisakkut nikanarsaanermik kinguneqarsinnaasoq
Siunnersuisoqatigiit aarleqqutigaat inatsisissatut siunnersuut akuerineqarpat iluaqutissartaqarnavianngitsoq, taamaattorli nunami akuulersitsinissamut aammalu killilersorneqannginnissamut pisinnaatitaaffinnut ipisitsissasoq, naak siunnersuutip tamakku oqilisaaffiginissaanik siunertaqarniaraluartoq.
- Siunnersuummi erserpoq oqaatsit allat atorlugit naalagiartitsinerit pasinninnermik kinguneqarsinnaasut. Taamaaliortoqassappat upperisakkut nikanarsaanermik malersuinermillu kinguneqarsinnaavoq, ammasumik allakkami allassimavoq.
Siunnersuummi siunertarineqarpoq Danmarkimi allamiut oqaasiinik naalagiartitsinerit nutserneqartalernerisigut muslimit inuusuttut ingasattajaarniartunngortinniarnerisa unitsinnissaat.
Siunnersuut februarimi saqqummiunneqassaaq
Mogens S. Mogensen, Danmarkimi ilagiit siunnersuisoqatigiinni siulittaasoq siunnersuut pillugu ima oqaaseqarpoq:
- Upperisarsiornermut tunngatillugu pinngitsaaliineq atorlugu inuiaqatigiinnut akulerutsitsiniaasoqarnermi oqaluttuarisaanermi iluatsittumik assersuuteqartoqarpa? Inatsisissatut siunnersuut iluareqqusaarnertut allanillu upperisaqartunut malersuinertut isigineqartariaqarpoq.
Siunnersuut upperisat assigiinngitsut akornanni oqallitsitsilersimasoq, Folketingimi februarimi saqqummiunneqassaaq.