Siunnersuisoqatigiit: Imigassamut inatsit iluaqutaavoq

Imigassaq pillugu inatsit iluaqutaavoq, taamaattumik taamaatsiinnarlugu attanneqartariaqaraluarpoq.

Intsisip siorna marsip aallaqqaataani atuutilersup arlalitsigut sakkukkillileriffigalugu Inatsisartut ullumi suliarinninnissat sioqqullugu, imigassaq ikiaroornartorlu pillugit siunnersuisooqatigiit ersarissumik taama oqariartuuteqarpoq.

Imigassamik atuinerup imigassap aalakoornartutallip inuup ataatsip liiterimik ataatsimik 2018-imi appariarsimaneranut, siunnersuisoqatigiit innersuussipput. Atuineq 2013-imili aalajaalluni inissisimariarluni appariarneq pivoq.

- Imigassap eqqussuunneqartup appariarneranut killilersuilluni inatsisiliortoqarnera Imigassaq Ikiaroornartorlu pillugit Siunnersuisooqatigiit pitsaasumik ingerlasoqalernera nalilerpaat. Nunani allani misissuinerit takutippaattaaq, imigassap takussaanerata killilersorneqarnera iluaqutaasoq. Imigassaq pillugu ussassaarinerup inerteqqutaarnera iluaqutaavoq aamma imigassamik tuniniaanerup killilersimaarnera iluaqutaavoq, Imigassaq ikiaroornartorlu pillugit siunnersuisooqatigiinni siulittaasoq, Inga Dora G. Markussen, tusagassiuutinut nalunaarummi taama allappoq.

Atuinerulerneq atornerluinerlu ernumassutigigaat

Imigassaq pillugu inatsit assiaqusersuinermut, ussassaarinermut aamma ammasarfinnut tunngatillugu Naalakkersuisut sakkukillilerinissaat Inatsisartut ukiaq suliakkiissutigaat.

- Imigassaq Ikiaroornartorlu pillugit Siunnersuisooqatigiit akissuteqaammini tikkuarnikuuaat allannguineq imigassamik atuineq qaffannissaanik kinguneqarumaartoq taamaasilluni amerlanernerit atornerluisunngorsinnaallutik. Meeqqat inuusuttullu amerlanerit taamaasillutik imigassamut kingunerlutsinneqarsinnaapput.

- Imigassaq tamatigungajak persuttaanermi, kinguaassiutitigut kanngutsaatsuliornermi, imminut toqunnermi sumiginnagaannermilu ilaasarpoq.

Imigassartornermut kulturi pitsaanngitsoq

- Misissuinerit takutippaat nunatsinni inuusuttut siusippallaamik imertalertartut, taamaasiornikkullu siunissaat pitsaannginnerusumik isikkoqalersinnaavoq atornerluinermullu tunngaviusinnaalluni.

- Taassuma saniatigut maani nunatsinni ajoraluartumik annertuumik aalakoorniutigalugu imertariaaseqarpugut. Taamatut imertariaaseq inuup peqqissusaanut ulorianarpoq. Kisianni aamma ilaqutaasut aalakoorniutigalugu imertariaatsimit pingaartumik eqqugaasarput.

- Siunnersuisooqatigiit isumaqarput init tamanut ammasut meeqqanut inuusuttunullu imigassamut assiaqusersornissaat attatiinnarneqarnissaa aalajangiusimasariaqaripput. Upperaarput imigassamut inatsit maanna atuuttoq siunissaq eqqarsaatigalugu imertariaatitsinnik allannguinissamut pitsaanerusumik periarfissiisoq, ullumikkummi imertariaaseq pingaartumik meeqqanut inuusuttunullu kingunerluuteqarpoq.

- Taamaattumik politikerit kaammattorusuppagut sakkukillilinnissamut taasinnginnermi eqqarsarluaqqaarnissaat.