Siunnersuisoqatigiit: Ajornartoornermi aningaasanik Danmarkimut taarsigassarsisoqarli
Naalakkersuisut isumaqarput 2020-mi coronap ajornartorsiortitsinerani Nunatta Karsia aningaasassaqarluartoq. Ukiaruli miliardilikkaanik taarsigassarsinissaq pisariaqalersinnaavoq. Naalakkersuisut aningaasanik Danmarkimut taarsigassarsisariaqarput, siunnersuisoqatigiit inassutigaat.
Aningaasaqarnermut Naalakkersuisup Vittus Qujaukitsup, nunap aningaasaqarneranik ingerlatsineq pillugu ukiumoortumik nalunaarut tallimanngorpat Inatsisartuni saqqummiutissavaa. Nalunaarut tamanut saqqummiunneqareerpoq, tupinnanngitsumillu coronap ajornartorsiortitsinerata aningaasaqarnermut sunniutissai sammineqarluarput.
Apeqqtutit annertuut ilagaat, Kalaallit Nunaata ajornartorsiut qaangerniarlugu aningaasanik qanoq amerlatigisunik taarsigassarsinissaa.
Nalunaarummi allassimavoq, Aningaasaqarnermut Naalakkersuisoqarfiup maajip qiteqqunnerani naatsorsuutigisimagaa, Nunatta Karsiata 2020-mi naammattunik aningaasaateqarnissaa. Ukiamulli taarsigassarsisoqarnissaa pisariaqalersinnaasoq ilimagineqarluni:
Sivisuumik ajornartorsiorneq akisussasoq
- 2021-mi naammaginartumik akiliisinnaassuseqarnissaq anguniarlugu taarsigassarsinissamik pisariaqartitsisoqalersinnaavoq, naatsorsuutigineqarmat 2021-mi aningaasanut inatsimmi amigartooruteqarnissaq, nassuiaammi allassimavoq.
Aningaasat taarsigassarsiariniakkat qanoq amerlatiginissaanut, ajornartorsiutip qanoq sivisutiginera apeqqutaassaaq. Ajornartorsiut sivitsoriartortillugu akisuneruleriartortussaavoq. Qaammatini arfiniliniit qaammatinut qulingiluanut sivisussuseqassappat en milliard koruunit missaannik taarsigassarsisoqartariaqassaaq, nassuiaammi missingerneqarpoq.
Naalakkersuisulli inassutigisimavaat, Aningaasaqarnermut Naalakkersuisoq 2,5 milliarder koruunit missaannik taarsigassarsinissamut danskit naalagaaffiannik taarsigassarsisitsisartuniluunniit allanik isumaqatiginninniassasoq. Anigaasat taaneqartut qaammatit 18-it angullugit ajornartorsiornermut matussusiisinnaapput.
ØR: Naalagaaffimmit taarsigassarsisineq eqaanneruvoq
Nalunaarut naapertorlugu Aningaasaqarnermut Siunnersuisoqatigiit isumaqatigiittut 2 aamma 2,5 milliarder koruunit akornanni taarsigassarsinissaq naammaginartutut isigaaat. Siunnersuisoqatigiit inassutigaat, Naalakkersuisut danskit naalagaaffiannut taarsigassarsiniassasut:
- Nalorninartorpassuit aamma akiliisinnaassuseqarnissamut pisariaqartitat erseqqissumik aalajangeruminaannerat pissutigalugit, siunertamut naapertuunnerpaassaaq naalagaaffimmit taarsigassarsisoqarnissaa. Eqaatsumik erniakitsumillu taarsigassarsisitsisoqarsinnaavoq (danskit naalagaaffianni obligationit erniaattut erniaqassappata), aamma taarsigassarsiat naalagaaffimmit qularnaveeqquserneqarsinnaapput, Aningaasaqarnermut Siunnersuisoqatigiit Naalakkersuisunut allapput.
Ikiorsiissutinut aningaasartuutikinneruneq
Qujaukitsup taassumalu naalakkersuisoqarfiata maanna inissisimanermik naliliinerminni pitsaasuunerarpaat, inuussutissarsiortunut ikiorsiissutit naatsorsuutigisamit maannamut akisunerusimannginerat.
Assersuutigalugu 107 millioner koruunit aningaasarsianut taartissatut immikkoortinneqarsimapput, nassuiaalli naapertorlugu fire millioner koruuningajalluinnaat kisimik maajip qiteqqunnerani atorneqarsimapput.
Unammillernartitat uku aamma taaneqarput:
Air Greenlandimik kiffartuussinissamik isumaqatigiissuteqarnikkut, imarpik ikaarlugu timmisartuussisarnerup taperserneqarnissaanik pisariaqartitsineq.
Aalisakkat avammut tunineqarneranni akigititat apparput, tamannalu aalisarnermi isumalluutit erniaannik Nunatta Karsiata isertitaqartarneranut sunniuteqassaaq.
Takornariartitsisartut qularnanngitsumik misigissavaat, 2020-mi avataanit takornariaqarpallaartoqannginnissaa.
Kommunit akileraarutitigut isertitat ikileriarnerat pissutigalugu, Namminersorlutik Oqartussanut taarsigassarsinissamik pisariaqartitsilissasut naatsorsuutigineqarpoq. Naalakkersuisut siunertamut tassunga 150 millioner koruuninik immikkoortitsigallarsimapput.