Siunnersuisoqatigiit aningaasaliissutaasartut pingasoriaatinngortikkusuppaat

Kalaallit Nunaanni Inuit pisinnaatitaaffii pillugit Siunnersuisoqatigiit 2022-mi 3,2 millioner koruuninik aningaasaliiffigineqarnissartik kissaatigaat. Aningaasaliissutigineqartut pingasoriaataannik annertugisunik aningaasaliiffigineqarusupput.

mennesker

Inuit pisinnaatitaaffii pillugit Siunnersuisoqatigiit aningaasanut inatsit aqqutigalugu ukiumut 900.000 koruuninik aningaasaliiffigineqartartut, aningaasaliissutigineqartartut maannakkorni qaffasinnerunissaat kissaatigaat.

Siunnersuisoqatigiit ileqquusumik ataatsimiinnermi naatsorsorsimavaat, inatsit malillugu sulisoqassappat aningaasat qanoq amerlatigisut pisariaqartinneqarnersut. Siunnersuisoqatigiit inatsit malillugu aningaasaliiffigineqarnissamut kissaatigisatik kingusinnerpaamik apriilip 15-ani Naalakkersuisunut tunniuttussaavaat. Siunnersuisoqatigiillu 2022-mi 3,2 millioner koruuninik aningaasaliiffigineqarnissamik kissaatertik ukioq manna nassiussimavaat. Tassa maanna aningaasaliissutigineqartartunit 3,2 millioner koruuninik amerlanerusut kissaatigisimavaat:

- Taamaattumik 3,2 millioner koruuninik ataatsimoortumik aningaasaliiffigineqarnissaq
qinnutigaarput. Inatsisip naammassinissaanik neriuuteqarsinnaassagutta, Ludvig Larsen inuit pisinnaatitaaffiit pillugit siunnersuisoqatigiinni siulittaasuugallartoq oqarpoq.

Ludvig Larsen

Taassuma Sara Olsvig ilinniarnini pissutigalugu juulip tungaanut Danmarkimiittoq paarlassimavaa.

Suliassat kinguartinneqartartut

Siunnersuisoqatigiit aningaasaliissutigineqartartut qaffanneqarnissaat pillugu arlaleriarlutik Naalakkersuisunut saaffiginnittaraluarlutik iluatsitsisarsimanngillat.

Inuit pisinnaatitaaffii pillugit Siunnersuisoqatigiinni siulittaasuugallartup Ludvig Larsenip tusagassiorfinnut nalunaaruteqarnermi nassuiaatigaa, aningaasaliissutigineqartartut annikinnerisa malitsigisaannik, siunnersuisoqatigiit ukioq aningaasaliissuteqarfiusoq anigorniarlugu suliatik annikillingaatsiarsimagaat. Angalanerit tamarmik unitsinneqarsimapput, inatsisitigut pisussaaffigineqartut soqutigisaqartunik
ataatsimeeqateqarnissaq ingerlanneqarsinnaasimanngilaq aamma nutserinernut aningaasartuutit peerneqarsimapput, allaffissornermilu aningaasartuutit ikilisinneqngaatsiarsimallutik. Taamaakkaluartoq saniatigut aningaasartuutinut naatsorsuutigeriinngisanut missingersuutini aningaasassaqartitsisoqarani.

- 2022-mut missingersuutinut siunnersuut naatsorsuutigisanut piumasaqaatinullu
Siunnersuisooqatigiinnut inatsimmi nassuiarneqartunut sanilliullugu siunnersuisooqatigiit
allattoqarfiullu pisariaqartitaannut naleqqussaqqissaagaavoq. Pitsaasumik aningaasaqarnissarput suli sorsuutigissavarput aammalu politikkikkut aqutsisunngortut qulakkerussutissagaatigut neriuutigalutigu, Ludvig Larsen oqarpoq, erseqqissaassutigalugulu siunnersuisoqatigiinni ilaasrotat tamarmik namminneq piumassusertik malillugu sulisuusut.

Patajaassutsip Siunnersuisoqatigiit ineriartortissinnaagai

Ludvig Larsen isumaqarpoq, Siunnersuisooqatigiit suliassamik suliarisinnaanissaannut aammalu ineriartortitsinerup Siunnersuisooqatigiit pilersinneqarneranni eqqarsaatigineqartup ingerlassinnaanissaanut aningaasaqarnikkut patajaassuseqarnissaq pisariaqartikkaat. Siunnersuisooqatigiit siunertaannut paragraffi malillugu Inuit Pisinnaatitaaffii pillugit Siunnersuisoqatigiit ataatsimut isigalugu Kalaallit Nunaanni inuit pisinnaatitaaffii pillugit ilisimasanik annertusaaqataasussaapput piginnaanngorsaaqataasussaallutillu.

- Siunnersuisooqatigiinni ilaasortatut suliassaq uagutsinni pisariaqartoq suliarisinnaannginnatsigu annernarpoq. Siunnersuisooqatigiit aningaasaqarnikkut inissisimaneq pissutigalugu 5 ørit tamaasa mumittaarnerannut piffissaq annertuallaaq atortarpaat. Assersuutigalugu atuartitsinermut paasititsiniaanermullu najoqqutassanik suliaqartoqanngilaq aammalu aningaasanik amerlanerusunik aningaasaliisoqareertinnagu pisinnaanani. Tamanna killup tungaanut ineriartorneruvoq, Ludvig Larsen naggasiivoq.

Powered by Labrador CMS