Siunnersuisarfiup allaffini Nunatsinniittut matuniarai
WSP Arcticip ilaatigut sanaartornerup iluani siunnersuisarfiusup suliarisartakkani unitsippai.
Suliffeqarfik WSP Arctic ukiuni qulini kingullerni najukkani suliffeqarfinnut avatangiisit, pilersuineq, attaveqaasersuineq sanaartornerlu pillugit siunnersuisarsimavoq. Tamannali maanna unitsinneqartussanngorpoq.
WSP Arcticip Nunatinni suliaqartarnini annikilliartuaartillugu aallartissimavaa, 2022-milu suliaarutivinnissani naatsorsuutigalugu. WSP Arctic Nuummi Ilulissanilu maannamut 14-inik aalajangersimasunik sulisoqarsimavoq.
- Najukkani suliassat naammassineqartarnissaat isumagiuartarsimavarput, ajoraluartumilli paasisimavarput tamanna naammassiuminaatsittarlugu, WSP Arcticip siulersuisuini siulittaasoq Per Møller-Jensen oqarpoq.
Siunnersuisarfiup piffissap tullia atorlugu suliassat ingerlanneqartut naammassiniarniarpai.
Aatsitassarsiortut siunnersorneqartarnerat ingerlatiinnarneqassasoq
WSP Arctic Nunatsinni allaffeqarunnaaraluarluni siunnersuisarnerminik unitsitsivinnianngilaq. Suliffeqarfiummi aatsitassarsiornerup iluani siunnersuisarnini ingerlatiinnarniaraa ilisimatitsissutigineqarpoq:
- WSP Kalaallit Nunaanni immikkut ilisimasalittut suli suliaqartassaaq, assersuutigalugu aatsitassarsiorfiit sinnerlugit avatangiisitigut suliassat, ilaatigut Sikuki Harbour sinnerlugu imaani suliassaqarfiit aamma kulturikkut kingornussat illullu oqaluttuarisaanermut attuumassutillit pillugit suliassat pillugit suli siunnersuisassaaq, WSP-mit ilisimatitsissutigineqarpoq.
- Kalaallit Nunaanni ineriartortitseqataasimalluni maniguunnarpoq. Najukkani suliassanik naammassinnittarnissamik anguniagaqarsimanerput eqqortuusoq isumaqarpunga. Soorunami ingerlatsinitsinnik matusiniarnerput uggornarpoq, neriuutigaaralu Kalaallit Nunaanni inuiaqatigiit ajunngitsumik ineriartornerat ingerlalluassasoq, Per Møller-Jensen tusagassiorfinnut nalunaaruteqarnermi oqarpoq.