Skip to main content

Siunnersuineq: Saarulliit suli ikiliartorput

Pinngortitaleriffimmit siunnersuinikkut Kitaani saarullitassat ikilisinneqarput.

Sinerissap qanittuani saarulliit ikilisimaqaat, taamaammat Kitaani saarullittassat ikinnerunissaanik siunnersuisoqarsimavoq.

Pinngortitaleriffik tusagassiorfinnut nalunaaruteqarluni allappoq,  ICES-ip innersuussutigaa, Kitaani sinerissap qanittuani 2022-imi saarullittassat 4.780 tonsit qaangissanngikkaat, taamaasilluni siorna innersuussinermiit 500 tonsinik sinerissap qanittuani saarullittassat ikinnerunissaat innersuussutaavoq.

- Sinerisap qanittuani saarullittassat ikileriarnissaat naatsorsuutigineqareerpoq tassami saarulliit 2015-imiilli ikiliartorsimammata, tamatumalu saniatigut saarulleeqqat (ataatsimik ukiullit) pisarineqarsinnaanngortussat ikittuaraasut takuneqarsinnaasimammat, Pinngortitaleriffik allappoq.

Pinngortitaleriffik naapertorlugu, avataasiortut sineriammullu qanittumi aalisartut saarullittattassaat sineriammut qanittumi aalisartunit pisarineqartartut, taamaammallu saarullit katillugit 9.560 tonsit sinerissap qanittuani pisarineqartariaqarput, pisarineqartummi affaannai sinerissap qanittuaneersuusarmata.

Pinngortitaleriffik saarullinniartarnerup ineriartornera pillugu naatsumik eqikkaalluni allappoq:

- Saarulliit pisarineqartartut 2000-imiit 2016-imut 34.204-inik amerleriarsimapput. Tamatuma kingorna 2020-imi 17.926 tonsinut ikileriaqqissimallutik.

Decembarimi Naalakkersuisuusut aalajangerpaat 2020-mi sinerissap qanittuani saarullinniat 21.000 tonsinik pisassinneqassasut. Tassa siunnersuutaasimasut marloriaataannik amerlanerusut.

Qaleralittassatut siunnersuutit allanngortinneqanngitsut

Sineriammut qanittumi qaleralinniartarneq ukiuni kingullerni oqallisaasimaqaaq.

Qaleralittassiissutit eqqarsaatigalugi Kitaani sineriammut qanittumi avataanilu pisassiissutissatut siunnersuutigineqartut allannguuteqanngillat.

- Qalerallit Tunumi pitsannguuteqalaarput., Pinngortitaleriffik allappoq.

Pinngortitaleriffik
Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER