Siunnersortit: Avaleraasartoortassiineq ajunngitsumik ingerlasimavoq
Nalunaarusiakkut inniminnerneqarsimasukkut aalisarnermut naalakkersuisoq akulerussimasutut pinngitsuutinneqarpoq
Tallimanngormat unnukkut namminersorlutik oqartussat siunnersuinermik ingerlatsiviata Deloittep upernaaq avaleraasartoortassanik qinnuteqaatit qanoq ingerlanneqarsimanerannik misissuinini saqqummiuppaa.
Ataatsimut isigalugu siunnersortit suliassinneqarsimasut namminersorlutik oqartussat Karl-Kristian Kruselu (S) ingerlatsinermut, selskaberisimasaata KNT-p naleqarluartunik avaleraasartoortassinneqarneranik kingulimmut, sunniisimasutut unnerluutigineqarnerannik pinngitsuutippaat.
Ingerlaannaq qisuariarpoq
– Nalunaarusiami inerniliisoqarpoq takussutissaqanngitsoq aalisarnermut, piniarnermut nunalerinermullu naalakkersuisup selskabi iluaqutissinniarlugu ingerlatsineq sunnersimagaa - imaluunniit sunnerniarsimagaa, Krusep naalakkersuisoqarfiani pisortaq Jørgen Isak Olsen tusagassiorfinnut nalunaarutikkut allappoq.
– Ingerlatsiviup misissuinerata takutippaa naalakkersuisoqarfik ingerlaannavik qisuariarsimasoq, paasineqarmat Karl-Kristian Kruse (S) qanippallaamik attuumassuteqartoq.
Ernera naleqarluartunik pisassinneqarpoq
Misissuinermi pisassiinermik ingerlatsineq sammineqarsimavoq, pisassanik agguaassinerup inernera naapertuuttuunersoq nalilerneqarnani.
Tamatumani ilisimaneqartutut ilaqutariit Krusekut 30-40 millioner koruuninik nalilinnik pisassinneqarsimasut, tassa naalakkersuisunut ilaasortap ernera inuusuttoq aqqutigalugu.
Ukiup nutaap aallartinnerani qaammatit marlussuit ingerlaneranni selskabi KNT erneranut tunniunneqarpoq, taamanikkut angutaata selskabimi piginneqatigiissutini tunisinnaasimanngimmagit.
Kruse isornartorsiorneqarpoq
Tallimanngormat unnukkut Deloittep misissuisimanera naalakkersuisoqarfiup suli tamanut saqqummiussimanngilaa, tamannalu uggornarpoq nalunaarusiami assigiinngitsunik nalunaaruteqartoqarsimagunarmat.
Taamaasilluni naalakkersuisoqarfik tusagassiorfinnut nalunaarummini allappoq, ingerlatsinermik misissuinermi Deloittemut inniminnikkami aamma Karl-Kristian Kruse isornartorsiorneqartoq piffissaatillugu iliuuseqarsimannginneranut, qulakkeerniarlugu nammineq attuumassuteqarepallaarnini.
– Naalakkersuisulli arajutsisimavaa sulianik suliarinninnermut inatsimmi attuumassuteqarpallaarnermut aalajangersakkat naapertorlugit tamanna naammassimanngitsoq. Allatut oqaatigalugu, Karl-Kristian Kruse piaaraluni taamaasiorsimanngilaq, Deloittep misissuinera pillugu naalakkersuisoqarfiup pisortaa allappoq.