immikkut siunnersortit
Siunnersortinik atorfinitsitsisarneq unitsikkallarneqarpoq
Immikkut siunnersortinik atorfinitsitsisarneq unitsikkallarneqarpoq immikkut siunnersortit pillugit kaajallaasitap Naalakkersuisunit isumaliutigineqaqqinnerani
Naalakkersuisunut ilaasortanut immikkut siunnersortinik atorfinitsitsisarneq aamma aningaasarsiaqartitsarneq pillugu kaajallaasitaq, maannamut kusanaatsuliornernik marlunnik malitseqareersimasoq, Naalakkersuisuni maanna isumaliutigineqaqqilerpoq.
Taama Naalakkersuisut siulittaasuat Siumumeersoq Kim Kielsen paragraf 37 naapertorlugu Demokraatineersup Randi Vestergaard Evaldsenip apeqquteqaataanut akissuteqarluni ilisimatitsivoq.
- Immikkut siunnersortit pillugit maleruagassat ingerlatiinnarusunnerlugit uagut Naalakkersuisuni oqaluuseraagut. Apeqqutinnut akissuteqarnermut uunga atatillugu ilisimatitsissutigisinnaavara uagut Naalakkersuisuni isumaqatigiissutigigatsigu immikkut siunnersortinik atorfinitsitsisarneq unitsikkallarneqassasoq, taavalu kaajallaasitaq isumaliutigineqaqqilluni, Kim Kielsen taama akissuteqaateqarluni allappoq.
Atuaruk: D Naalakkersuisunut: Siunnersortit atorunnaarlik
Atuaruk: Naalakkersuisup siunnersortimi eqqartuussaasimanera tupaqqassutigigaa
Kim Kielsenip Randi Vestergaard Evaldsenimut akissuteqaammini aamma oqaluttuaraa kaajallaasitaq Naalakkersuisunut ilaasortanut immikkut siunnersortinik atorfinitsitsinissamut aningaasarsiaqartitsinissamullu periarfissiisoq, Naalakkersuisuusimasut atuutilertitarisimagaat, taamaattumillu nammineq maannakkut Naalakkersuisuni siulittaasuuffigisami pingaartitarinngikkaat imaluunniit aaqqissuussarinngikkaat.
Kaajallaasitaq taanna najoqqutaralugu Siumumeersup Karl Lyberthip, Naalakkersuisut aamma Siumup siulittaasorisimasaata Aleqa Hammondip inooqataanik, Tom Ostermannimik, immikkut siunnersortissamisut atorfinitsitsimanera saqqummiunneqarmat, aalisarnermut, piniarnermut nunalerinermullu naalakkersuisuuneranik naleqarpoq kaajallaasitap siorna atuutilersimatsiarnerani.
Maannakkut Naalakkersuisuutitaqartuni partii Atassutip naalakkersuisuutitai Knud Kristiansen aamma Mala Høy Kuko, kaajallaasitaq taanna najoqqutaralugu immikkut siunnersortimik atuiniarlutik kisimik aalajangersimapput. Taamaattorli Mala Høy Kukop immikkut siunnersortaa atorfimminit ingerlaannartumik tunuarpoq sakkortuumik nakuusersimanerminut eqqartuunneqarsimanera saqqummiunneqareersorlu.
Atuaruk: Naalakkersuisumut immikkut siunnersortimik atorfinitsitsisoqaqqippoq