Siunissamut ungasinnerusumut pilersaarutit aamma tatigeqatigiinnermik tunngaveqartumik suleqatigiinnerit
Suliffeqarfiit piffissami matumani ingerlalluartut tassaapput siunissamut ungasinnerusumut pilersaaruteqartut aamma tatigeqatigiinnermik tunngaveqartumik suleqateqateqartut, Dansk Industrimi pisortaq taama oqarpoq. Periaaseq tamannarpiaq iluatsilluartumik Brugsenimi ukiuni kingullerni qulini atorneqarsimavoq.
Ataatsimeersuarneq Future Greenland Nuummi Katuami marlunngormat pingasunngormallu ingerlanneqarmat, peqataasut 400-nit amerlanerusut Danmarkimeersut, Nunatsinneersut, Sverigemeersut, Savalimmiuneersut, Tuluit Nunaanneersut, Canadameersut, Islandimeersut, Frankrigimeersut, USA-meersut aamma Australiameersut takkussimapput.
Aviisi Sermitsiaq taama allappoq.
Ataatsimeersuarnermi arfineq-aappassaannik ingerlanneqartumi ukioq manna qitiutinneqartoq tassaavoq, takorluukkanit iliuutsinut qanoq ingerlariaqqittoqassanersoq. Oqallissaarisunut ilaavoq Dansk Industrimi pisortaq Lars Sandahl Sørensen, taassuma Kalaallit Nunaat siuariartorfiussappat tatigeqatigiilluni suleqatigiinnerit pingaaruteqassusiat pingaaruteqarnerarpaa.
– Ataatsimeersuarnermut Future Greenlandimut angisuunik anguniagaqarluta tamatta takkuppugut, taamaattorli naanguku iliuusissat aalajangersimasut? Suliffeqarfittut pilersaarummut peqataarusukkaanni taava qanoq iliortoqassava? Kikkut suleqatigineqassappat, Lars Sandahl Sørensen aallarniilluni oqarpoq.
– Piffissami sakkortuunik pisoqarfiusuni nalusatsinnik pissuteqartuni inuuvugut. Nunatut imaluunniit nunap immikkoortuatut ineriartornissamik kissaateqartutut, ingerlaviginiagassat ilungersunarsinnaasarput. Takusinnaasatsitut suliffeqarfiit maanna ingerlalluartut tassaapput allanik tatiginninnermik tunngaveqartumik suleqateqartut, taakkununngalu erseqqilluni sunik ikiorsiissuteqarnerminnik takunnissinnaanerat, Lars Sandahl Sørensen oqarpoq, tamatumunngalu atatillugu kajumissaarutigalugu pisortat namminersortullu suleqatigiinnermik aallartitsisinnaanissaat, mittarfiliassatut ilippanaatilinnut aatsitassarsiornissamullu periarfissanut atatillugu, taamaaliornikkut alloriarfissat tulliuttut suussanersut erseqqinnerulerniassammata. Aningaasaliisartunut pilerisaariniaraanni siunissamut ungasinnerusumut pilersaaruteqartoqartariaqarpoq, sumut ingerlariaqqinnissaq aamma suut anguniarneqarnersut erseqqissarnissaat pinngitsoorneqarsinnaanani.
Aviisimi Sermitsiami atuarnerusinnaavutit. Aviisi uani pissarsiariuk: