Siunersiuinerup kingorna: KNR pillugu aaqqiissuteqarnissaq Dorisip neriuutigaa
Inatsisartut kultureqarnermut ataatsimiititaliap, naalakkersuisoq Peter P. Olsen (IA) siunersiuinermut aggersarsimavaat. KNR-ip ajornartorsiornera aaqqiivigineqassasoq ataatsimiititaliaq neriuuteqarpoq. Nutaarsiassaqartitsivik inuttassaaleqineq pissutigalugu nutaarsiassat arlallit sivikinnerusumik ingerlattariaqalersimavai.
KNR-ip inissisimanera unammillernartoqarneralu politikkikkut maanna oqallisaalerpoq.
Inatsisartuni kultureqarnermut, ilinniartitaanermut, ilisimatusarnermut ilageeqarnermullu ataatsimiititaliap, naalakkersuisoq susassaqartoq, Peter P. Olsen (IA) unammilligassat KNR-imit nalaanneqartut iliuuseqarfigineqarnissaat qulakkeerniarlugu marlunngormat siunersiorsimavaa.
Ataatsimiititaliami siulittaasup, Doris J. Jensenip (S) tamanna tusagassiutinut nalunaarummi ilisimatitsissutigaa.
- Ajornartorsiutit imaannaanngitsut KNR-ip pisortaata tunualersup kiisalu Tusagassiuinermi Sulisut Peqatigiiffiata oqaatigaat. KNR nunatsinni kulturikkut ingerlatsinermi suliffeqarfittut nukittorsarneqartariaqarpoq. Unammilligassat KNR-imit nalaanneqartut iliuuseqarfigineqartariaqarput, ataatsimiititaliaq isumaqatigiittoq ataatsimut oqaaseqarpoq.
Sulisoqarnikkut ajornartorsiortut
KNR radioaviisimi, Qanoruumi nittartakkamilu nutaarsiassiisarnerminik siornali annikillisaasarpoq, sulisutigut amigaateqarneq pissutigalugu.
Kultureqarnermut ataatsimiititaliaq isumaqatigiittoq kultureqarnermut Naalakkersuisumut, Peter P. Olsenimut kaammattuuteqarpoq suleqatigiissitamik pilersitsisoqassasoq. Suleqatigiissitamik pilersitsinissaq Naalakkersuisunit 2022-mi oqaatigineqareerpoq.
Ataatsimiititaliap ilanngullugu oqaatigaa unammilligassat aaqqiissutissallu pillugit nassuiaammik suliaqarnissaq iluaqutaasinnaasoq.