Siunersiuineq: Naalakkersuisoq isornartorsiummut annerusumik akissuteqanngitsoq

Piniarnermut aalisarnermullu Naalakkersuisoq, Karl Tobiassen (S) Inatsisartuni piniarnermut, aalisarnermut nunalerinermullu ataatsimiititaliamit ammasumik siunersiuinissamut ullumi piaartumik aggersarneqarpoq. Ombudsmandip isornartorsiuinera tamassumunnga tunngaviulluni.

Ombudsmandip isornartorsiutimini Naalakkersuisut tikaagullinnik ataatsimoorluni piniarnissaat aalajangersimasumik piffissalerneqassasoq aalajangiisimanerat isornartorsiorpaa, tamannami inatsisitigut tunngavissaqanngilaq.

- Soorunami pisoq uggornarluinnartutut isigaara. Taama oqareerlunga oqaatigisinnaavara naalakkersuisoqarfiup sulissutigimmagu nalunaarutip suliareqqinnissaa. Suliamut tunngasumik annerusumik oqassanngilanga, Ombudsmandip isornartorsiuineranut akissummik naalakkersuisoqarfik suliaqarmat, akissullu Ombudsmandimut nassiunneqareerpat ataatsimiititaliaq aamma ilisimatinneqarumaarpoq, piniarnermut aalisarnermullu Naalakkersuisoq, Karl Tobiassen (S) ammasumik siunersiorneqarami oqarpoq.

Pisut ilikkagaqarfigineqarpat

Naalakkersuisoqarfiup inatsimmik tunngaveqanngitsumik aalajangiinera siulliunngilaq. Ataatsimiititaliamilu ilaasortaq Jens-Frederik Nielsen (D) oqarpoq Naalakkersuisut Ombudsmandip siullermik isornartorsiuineranit ilikkagaqarsimanersut nalorsaatigalugu.

- Isornarluinnarpoq Naalakkersiusut inatsisitigut tunngavissaqaratik taama aalajangiisinnaanerat. Maluginiarpara siornatigut taama ilioreersimasut, soorlu Ombudsmandip isornartorsioraa. Naalakkersuisumut tatiginnissinnaaneq innarlerneqaratarsinnaavoq, pissutsillu pillugit paasisagut tamuaqqaalaartariaqarpagut, piniarnermut aalisarnermullu ataatsimiititaliami ilaasortaq Jens-Frederik Nielsen (D) oqarpoq.

Ammasumilli siunersiuisoqareernerani oqaannarsinnaanngilaq Naalakkersuisoq tatigiunnaarsimanerlugu.

Kukkoqqinnginnissamut qanoq iliortoqarpa

Ombudsmandip isornartorsiuinera, suliamilu iluarsiiniarluni suliat pillugit paasisaqarumalluni ataatsimiititaliap naalakkersuisoq piffissap sivikitsup iluani ammasumik siunersuinissamut aggersarpaa.

Karl Tobiassenip nalunaarutit nutarterneqarnissaat pillugit itinerusumik oqaaseqarsinnaanngilaq, ilaatigulli oqarluni naalakkersuisuuffimmi nalaani nalunaarutit arlallit nalimmassarlugit suliarisimallugit. Tamassumunnga assersuutaasinnaasoq nannut piniarneqartarnerat illersorneqartarnerallu pillugu nalunaarut, nutarterlugu saqqummiunneqaqqammersoq.

Naalakkersuisoq Sermitsiaq.AG-mut oqarpoq kukkusoqaqqissanngippat suliassaqangaatsiartoq:

- Sukaterisoqartariaqarpoq. Assersuutigalugu aalisarnermut akuersissutit pillugit nalunaarut iluarsineqarsimavoq, tikaagullinnullu tunngatillugu aamma suliaqalereerpugut. Ataatsimoorluni piniarsinnaanermut tunngatillugu ersarissaassutissanik suliaqarpugut, Karl Tobiassen oqarpoq.

Naalakkersuisoqarfiup Ombudsmandimut akissutissamik suliaqarnera pissutigalugu suliamut tunngatillugu annerusumik oqaaseqarsinnaanani erseqqissaqqippaa.