Siumut: Tunumi tunitsivimmik amigaateqartoqarpoq

Tunumi inuussutissarsiornikkut ineriartortitsisoqarnissaa pisariaqarluinnartoq, tunitsivimmillu pilersitsisoqartariaqartoq, Inatsisartuni ilaasortanngorlaap Siumumeersup, Lars Poulsenip oqaatigaa. Tunumi misileraalluni aalisarnerit arlallit iluatsinngitsoornikuusut, Polar Seefood-imi siulittaasoq Henrik Leth paasissutissiivoq.

Inatsisartuni ilaasortanngorlaaq Lars Poulsen tunumi paasisassarsiorluni angalaqqammerpoq. Oqartussat Nunatta kangiani inuussutissarsiornikkut ineriartortitseqataasariaqartut, taanna isumaqarpoq.

- Imartarujussuaq annertoqisoq aalisagarpassuarnik arfernillu assigiinngitsunik pisoorsuaq tunisassiorfeqanngilaq, tunitsiviliinikkut aningaasarsiorneq annertuumik ingerlalluartoq pisinnaalluaraluarpoq, Lars Poulsen oqarpoq.

Arctic Prime Fisheries maanna Kuummiuni ataatsimik tunitsiveqarpoq, tunitsivimmut innaallagialersuineq maanna ajornartorsiortitsimmat matoqqatinneqarallappoq. Aalisartut maanna qaammatip missaa tunisaqarsinnaasimanngillat. Tamannalu aningaasarsiornissamut unammillernarpoq.

Tunumi misileraalluni aalisartoqartarnikuuvoq. Suliffeqarfiit tallimat assigiinngitsut 2017-imi avaleraasartuunik misileraallutik aalisarput. Polar Seafoodilu saattuarniarluni 2018-imi misileraavoq. Misileraalluni aalisarnerit tamarmik suliffeqarfinnut iluatsiffiusimanngillat.

- Misileraalluni aalisartoqarnikuuvoq, ajoraluartumilli iluatsitsiffiunani, Henrik Leth Sermitsiaq.AG-mut oqarpoq.

Kikkut tamarmik peqataasariaqarput

Tunumi inuussutissarsiorneq inerisarneqarnissaanut oqartussat tamarmik kattuffiillu akisussaaffimmik tigusisariaqartut, Inatsisartuni ilaasortaq Siumumeersoq isumaqarpoq.

- Kommuneqarfik Sermersooq, pisortat suliffeqarfiutaat, inuiaqatigiillu pigisaat Royal Greenland, kattuffissuillu assersuutigalugu KNAPK akuleruttariaqarput, aalisakkanik neqinillu tunitsivimmik pilersitseqataasariaqartut kaammattussavakka, Lars Poulsen oqarpoq nangillunilu:

- Pissutsit taamaattut naammatsiffigaakka. Nunatta kangiani innuttaasut nunatta inuisa 8 procentiisa missigaat. Nalunngilarpullu kangianiit kimmut nuttartoqartoq. Taamaattumik nunatta kangiani inuussutissarsiornikkut piaarnerpaamik aallartitsisoqartariaqarpoq, Lars Poulsen oqarpoq.

Powered by Labrador CMS