Siumut: Siulittaasumik ukioq manna qinersisoqassaaq
Siumut nuna tamakkerlugu ataatsimeersuarnissaminik aammaarluni piffissami killiligaanngitsumi taamaatitsigaluartoq, partiip siulittaasussaanik ukioq manna naatinnagu qinersisoqarsimassaaq. Tamanna qanoq pissanersoq suli ilisimaneqanngitsoq, aaqqissuussaanikkut siulittasup tullia Evelyn Frederiksenip oqaatigaa
Covid-19-ip suli tuniluussinnaanerata aarlerinartorsiortitsinera pissutigalugu Siumumi siulersuisuunerit partiip nuna tamakkerlugu ataatsimersuarnissaata kinguartinnissaanik aammaarlutik aalajangiussisariaqarsimapput. Taama Siumumi aaqqissuussaanikkut siulittaasup tullia, Evelyn Frederiksen, Sermitsiaq.AG-mut oqarpoq.
- Uggornartorujussuuvoq, kisianni tamanna nunatsinnik partiimillu piffissaq eqqorlugu qajassuussiniarneruvoq. Angalasunut killilersuinerit pillugit nalunaarut nutaaq kingulleq sioqqullugu ataatsimeersuarniarluta aalajangersimavugut, maannalu pissutsit allanngorsimapput, oqarpoq.
- Nunatsinni Europamilu corona eqqarsaatigalugu qanoq pisoqarneranut malinnaasimavugut. Tuniluunnerup siaruaannissaanut suli aarlerinartoqarpoq, tamannalu pimooruttariaqarparput.Aallartitat nunatsinnit sumiiffinnit 36-neersut 60-it sinneqartussaammata inuiaqatigiit tamarmiusut eqqarsaatigisariaqarpavut, tuniluunnerullu siaruaakkiartulernissaanut uagut pissutaassanngilagut, siulittaasup tullia oqarpoq.
Siulittaasumik qinersineq ingerlanneqassaaq
Kisianni siulittaasumik qinersinissaq eqqarsaatigalugu taamaatitsineq unammilligassanik pilersitsivoq.
Ileqquusumimmi ataatsimeersuarnermi ukiut pingasunngorneri tamaasa siulittaasumik qinersisoqartartussaavoq. Taamaammat tamatuma qanoq ingerlanneqarnissaa siulersuisuunerit maanna isummerfigissavaat.
- Qanoq ingerlakkumaarneripput maanna oqaloqatigiissutigissavarput. Malittarisassaqarpugut malinneqartussaasunik, tamannalu aallaavigalugu aaqqiissutissamik nassaartariaqarpugut, Evelyn Frederiksen oqarpoq.
Siulelrsuisuunerit periarfissanik eqqartuereerunik siulittaasumik qinersinerup qanoq ingerlanneqarnissaa pillugu siunnersuummik immikkoortortaqarfinnut inassuteqaateqassapput, Evelyn Frederiksen paasissutissiivoq.