Siumut: Qipoqqarnik eqqissisimatitsinissaq kinguartinneqarli
Kommuneqarfik Sermersuumi kommunalbestyrelsip ullumi aalajangiiffigissavaa, Nuup Kangerluani qipoqqaat eqqissisimatinneqalissanersut. Oqallittoqarnissaa ilimanarpoq, Siumummi eqqissisimatitsisoqalersinnaanera kinguartikkusuppaa.
Nuup Kangerluani qipoqqaat eqqissisimatinneqarnissaannut siunnersuummik tusarniaaneq naammassineqarsimavoq, tusarniaanermut akissutit katillugit 27-t tiguneqarsimallutik, taakkunannga ataasiinnaq taamatut suliniuteqartoqarneranut akerliusimavoq.
Akerliusut tassaappt Nuummi Aalisartut Piniartullu Peqatigiiffiat NAPP, peqatigiiffimmit eqqissisimatitsinissamik pilersaarut akerlerineqarpoq, innersuussutigalugulu bundgarnersornerup unammillernartoqartarnera. Kommunalbestyrelsimullu saqqummiussissummi allassimasoqanngilaq, bundgarnersorluni aalisarnissamut qiannuteqaammik tunniussisoqarsimanersoq.
Ikinnerussuteqarlutik oqaaseqartut
Aningaasaqarnermut Inuussutissarsiornermullu Ataatsimiititami amerlanerussuteqartut ataasinngormat inassutigaat eqqissisimatitsinissaq atuutsinneqalissasoq, Siumumiilli ikinnerussuteqarlutik oqaaseqaateqarnerminni inassutigineqartoq itigartinneqarpoq.
Siumumit itigartitsissuteqarnermut tunngavilersuutigineqarpoq, qinigaaffimmi tulliuttumi FN-imi nunat inoqqaavisa pisinnaatitaaffiisa missorneqarnissaat kissaatigineqartoq aamma suliami aningaasaqarnermut tunngassuteqartut paasissutissallu amigaatigineqartut.
Ataatsimiinneq aallartilersoq
Kommunalbestyrelsimi amerlanerussuteqartunit Siumumit piumasarineqartut malinneqanngippata eqqissisimatitsinissaq atuutsinneqalersinnaavoq, tassa Namminersorlutik Oqartussat siunnersuummik allannguisinnaanngimmata.
Kommunalbestyrelsi ullumi nalunaaqutaq sisamap-qeqqanut ataatsimiilluni aallartissaaq.
Aamma atuaruk: WWF: Nuummi qipoqqarnik eqqissisimatitsinissaq atuutilissappat tunissutaassaaq annertooq
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...