Siumut: Politikerit akuersissutinik pisassiissutinillu suli aqutsissapput
Siumumi oqaloqatigiinnerup kingorna, akuersissutinik aqutsisoqarfimmik immikkoortumik pilersitsisoqarnissaa partiip akuerinngikkaa nalunaarutigineqarpoq.
Siumut aalajangiisuussappat, politikerit akuersissutinik pisassiissutinillu suli aqutsissapput,
Partiip sapaatip akunnerani matumani aalisarnermut inatsimmut nutaamut piumasaqaatini nalunaarutigai, akuersissutinullu aqutsisoqarfimmik immikkut pilersitsisoqarnissaa partiip kissaatiginngilaa, tamanna aalisarneq pillugu ataatsimiititaliarsuup inassuteqaataannut ilaavoq.
- Inuiaqatigiimmi pisuussutaat pingaarnerpaat atorfilittaniit allaniilluunniit avataaneersunit agguaanneqartalertussanngortinneqassanngillat, aamma qinikkat tunngavissiillutik aalajangiisinnaajunnaarsinniarneqassanngillat, partiimi siulittaasoq Erik Jensen, tusagassiuutinut nalunaarummi oqarpoq.
Taamaattorli pisassiisarnermili maleruagassat ersarissut pilersinneqassasut nangilluni oqaatigaa, peqatigisaanik ammasumik kammalaatersorfiunngitsumillu ingerlatsinerup qulakkeersimanissaa pingaaruteqarnerarpaa.
Attuumassuteqanngitsumik aalajangiisoqartarnissaa inassutigineqartoq
Akuersissutinik agguaasarnerit aamma pisassiisarnerit politikerinit suliarineqartarnerat arlaleriarluni ajornartorsiutaanerarneqartarpoq, nalituut tassani pineqarmata, qanitanik salliutitsisoqariaannaasarmat.
Aalisarneq pillugu Ataatsimiititaliarsuaq inatsimmi attuumassuteqanngitsunik aalajangiisoqartarnissaanik atulersitsinissamik inassuteqarpoq, politikerit taamaalillutik aalajangiinernit ungasillisinneqassammata.
Ataatsimiititaliarsuarmit inassutigineqartoq allat tassaavoq, aalisarnerni ullumikkut ataasiakkaanut pisassiissutit tunineqarsinnaasut atuuffiginngisaanni atulersitsinissaq. Siumup tamanna aamma nangaassuteqarfigaa:
- Sinerissap qanittuani qaleralinniarnermi umiatsiaararsortunut IOK atuutsinniarneqassappat, pitsaaqutit mianerisassallu nalilersoqqaarneqassasut Siumup kissaatigaa. Tassami siusinnerusukkut taamaasiornermi rejerniarnerup iluani misilittakkat iliuuserisimasallu kingunerisimasaat eqqumaffigeqqissaarlugit sulineq ingerlanneqartariaqartoq Siumut isumaqarpoq, Erik Jensen oqarpoq.
Sinerissap qanittuani aalisartunut akuersissutit unitsinneqassanngitsut
Aalisarnermut inatsisissamut nalunaarutit Siumumi annertuumik oqallisigineqarsimasut, Siumumi siulittaasup oqaatigaa.
Aammattaaq ataasiakkaanut pisassiissutit atulersinneqannginneranni akuersissutinik amerlanerusunik agguaasoqassanngitsoq, Aalisarneq pillugu Ataatsimiititaliarsuarmi kissaatigaa amerlanerussuteqartut kissaatigaat. Inassuteqaat taanna Siumut akuerinngilaa:
- Sinerissap qanittuani aalisarnermi 5 tons ataallugu pisaqartarsimasut akuersissutaannik atorunnaarsitsinissamik eqqartuinerit Siumup isumaqatiginngilluinnarpai. Aalisartut umiatsiaararsortut aamma nunaqarfinni innuttaasut aningaasarsiorsinnaanerat innarlerniarneqarsinnaanngilluinnartoq Siumut isumaqartuaannarpoq, tusagassiuutinut nalunaarummi taama allaqqasoqarpoq.