Siumut: Partiip aallartitai tamarmik Nuummut aggersarneqassapput
Partii 27.-29. november ataatsimeersualerpat, allartitat 65-it tamakkerlutik Nuummiissapput.
Siumut novemberip naalernerani ataatsimeersualerpat partiip aallartitai tamarmiullutik Nuummi naapissapput. Tassani politikkikkut oqaluuserisassat oqaluuserineqassapput, partiillu ukiuni pingasuni tullerni siulittaasussaa qinerneqassaaq imaluunniit qineqqinneqassaaq.
Siumumi aallartitat 65-iusut tamarmik Nuummut ulluni 27.-29. november ataatsimeersuariassapput.
Siumut tusagassiorfinnut taama nalunaaruteqarpoq.
Aallartitat tassaapput immikkoortortaqarfinniit, siulersuisuunernit kiisalu Inatsisartuni partiip ilaasortaatitai, Naalakkersuisut, Folketingimi ilaasortaq aamma partiip borgmesteriutitai.
- Covid-19 ingerlaarnera Siumumiit malinnaaffigiuarsimavarput. Ataatsimeersuarnerlu kinguartinneqarallarneqartarsimalluni. Partiimiit nalilerparput najuulluni ataatsimeersuarneq pisariaqartoq. Oqaluuserisassani pingaarutillinni pingaaruteqarami najuulluni oqallinnermik uummaarissumik ingerlanneqarnissaat pingaartikkatsigu, Siumup aaqqissugaanikkut siulittaasup tullia, Evelyn Frederiksen nassuiaateqarpoq.
Namminersorlutik Oqartussat katersuuttarnerit pillugit nalunaarutaat naapertorlugu naalakkersuinikkut allatulluunniit isummersornissamik sunertalinnut atuutinngilaq. Tassa naalakkersuinikkut suliaqarnermik katerissinnaaneq, tamat oqartussaanerannut tunngalluinnarmat, nalunaarut taakkununnga atuutinngilaq.
Nalunaarusiaq ilaatigut naalakkersuinikkut ingerlataqarlutik partiinut periarfissiivoq ataatsimiinnissat katersuunnissallu kommunit killeqarfii akimorlugit ingerlanneqarsinnaasut.
- Siumup ataatsimeersuarnissani sapinngisaminik annertunnerpaamillu peqqinnissaqarnikkut ilisimasatigut innersuussutaasut malilnniarlugit ataatsimeersuarnissaq ingerlatissavaa, tusagassiorfinnut nalunaaruteqarluni Siumut ilisimatitsivoq.