Siumut: Oqartussaniit paasissutissiinerit maqaasivagut
Nuummi kujataanilu tuniluuttoqarnissaa aarlerinaateqarpoq. Innuttaasut Atammimmi arfininngornermi misissortipput, Kangaamiunilu marlunngorpat juulip 20-ani aamma misissiorsoqassalluni. Innuttaasut toqqissisimatinniarlugit oqartussat paasissutissiisariaqartut, Siumut kaammattuivoq.
Inuit attaveqaqatigiiffinni tusatsiakkanik assigiinngitsunik ulikkaarpoq. Ilaatigut suliffeqarfinni assigiinngitsuni tuniluuttoqartoq aamma atuarneqarsinnaalluni. Innuttaasullu ilaasa paatsuungasut aamma atuarneqarsinnaapput, soorlu Qaqortumiit umiatsiarluni angalaartoqarsinnaanersoq. Siumup peqqissutsimut oqaaseqartartuata, Jess Svanep oqartussat paasissutissat eqqortut saqqummiuttariaqaleraat kaammattuutigaa.
- Nittartakkakkut oqalliffinni aqqusinermiluunniit inuit naapikkaanni tusatsiakkat tusarsaapput, tusatsiakkallu taakkua piviusuniit immikkoortikkuminaasinnaapput. Oqartussat paasissutissat eqqortut nalunngimmatigit inuiaqatigiinnut paasissutissiinissaat noqqaasutigaara. Ullut kingulliit pisut assigiinngitsut aallaavigalugit innuttaasut toqqissiniassammata, Jess Svane oqarpoq Sermitsiaq.AG-mut oqarpoq.
Suli tuniluuttoqarpoq
Pingasut aamma tunillatsissimasut tallimanngornermi juulip 16-ani paasineqarpoq. Nuummi marluk Qaqortumilu ataaseq. Nuummi tunillatsissimasoq ataaseq Atammimmi Kangaamiunilu angalasimavoq. Atammimmi innuttaasut arfininngornermi misissortipput, Kangaamiuniittullu marlunngornermi juulip 20-ani misissortissallutik.
- Inuiaqatigiit akornanni annertuumik toqqissiviilliortoqarpoq. Najugaqarfiit assigiinngitsut taaneqartarput, ilaatigullu oqalliffinni atuarneqarsinnaalluni innuttaasut angerlarsimatiinnarneqarallartut tunillatsissimasumik qanillisaqarsimammata. Tusatsiakkat tamakkut toqqissisimananngillat, Jess Svane oqarpoq.
Oqartussat sulinerat uparuartugassaanngitsoq taassuma naqissuserpaa, tuniluuttoqaratarsinnaaneranulli paasissutissanik amigaateqartoqartoq isumaqarluni.
Maanna Nunatsinni tunillatseqqasut 26-iupput. Kisitsit ippassaq 20-iuvoq.