Siumut: Nutaamik borgmesterertaartoqartariaqarpoq

Kommuneqarfik Sermersuumi borgmesterip Charlotte Ludvigsenip kukkussutai annertuallaaqimmata taarserneqartariaqarpoq, kommunimi Siumut gruppiannit oqaatigineqarpoq.

Kommuneqarfik Sermersuumi kommunalbestyrelsi marlunngornermi Kommunit Nakkutilliisoqarfiata isornartorsiutaa ilungersunartoq suliarissavaa.

Ataatsimiinnissarlu sioqqullugu kommunalbestyrelsimi Siumut gruppiannit oqaatigineqarapoq, borgmesteri suliap kinguneranik taarserneqartariaqartoq. Demokraatit kommunalbestyrelsimi gruppiannit amma sapaatip-akunnerata naanerani taamatut oqaaseqartoqarpoq.

Siumut gruppiat ineqarnermut tunngatillugu suliaq namminneq misigisimasartik aallaavigalugu misissorsimariarlugu allakkamik takisuumik tusagassiorfinnut nassiussisimavoq, tassanilu inerniliunneqarsimalluni borgmesteri tunuartariaqartoq, namminerlu tunuanngippat kommunalbestyrelsimit tunuartinneqartariaqartoq.

Borgmesterip Charlotte Ludvigsenip (IA) sapaatip-akunnerata naanerani oqaatigaa tunuarniarnani.

Siumumit suliat pingasut allakkami erseqqissaasutigineqarput, taakkulu kingunerannik gruppi borgmesterimut tatiginnikkunnaarsimavoq:

  • Nuukullak Manngua 3 aamma 3E pillugit attartornissamik isumaqatigiissut, politikkikkut suliarineqarsimanngitsoq – isumaqatigiissuteqarnermi 1.348.760 kr./ukiumut.
  • Manguaraq 35 pillugu attartornissamik isumaqatigiissut, politikkikkut suliarineqarsimanngitsoq – isumaqatigiissuteqarnermi 4.081.572 kr./ukiumut.
  • Iserit A/S-ip taarsigassarsinissaanik isumaqatigiissut, politikkikkut suliarineqarsimanngitsoq – 20 millioner koruunit.

Taarsigassarsisitsinissaq akueriumanngikkaat

Siumup allakkani kommunimi Aningaasaqarnermut Inuussutissarsiornermullu Ataatsimiititaq ataasinngornermi ataatsimeersoq nassiussimavaa .

Ataatsimiinnermi pineqartumi ataatsimiititaliap 20 millioner koruuninik taarsigassarsinissaq pillugu suliaq, borgmesterip Aningaasaqarnermut Inuussutissarsiornermullu Ataatsimiititamut akueriteqqaarnagut atsiorsimasaa suliarineqarsimavoq.

Siumup ataatsimiititami ilaasortaatitaasa 20 millioner koruuninik taarsigassarsiniarneq akueriumasimanngilaat, suliap erseqqissumik saqqummiunneqarsimannginnera pissutigalugu.

Ataatsimiinnermi oqaluuserisassat tullia, tassaasoq ingerlatsinerluttoqarsimanera pillugu sammisaqarnermi Siumumit borgmesterip tunuarnissaa piumasarineqarsimavoq. Suliarinerlunneqarsimasut Siumup suliat pingasut taasaasa ilagaat, suliarineqarsimasunillu pingasuusunit marluk kommunip ineqarnermut tunngatillugu suliaanik Namminersorlutik Oqartussat nakkutilliisimanerannut atatillugu paasineqarsimapput:

- Ajorpoq

- Siumut maana akuersaarunnaarpoq. Borgmesterip aqutsinermik inatsimmik Kommuninik
Nakkutilliisoqarfiup atuunneranik imaqarlunilu borgmesterip nammineq akisussaaffianik
nassuiaasumik imaqartumik sumiginnaanera ajorpoq, Siumut-gruppia allappoq, nangillunilu:

- Borgmesterip maannakkuinnaanngitsoq, arlaleriarlunili kukkunerminut sulisorisanik
pisuutitseqattaartuarnera ajorpoq, naak kommunit aqunneqarnerat pillugu inatsimmi nammineq akisussaasuuninni ilisimaarilluaraluarlugu.

Charlotte Ludvigsenip sapaatiummat Sermitsiaq.AG-mut nassuiaatigaa, atorfilittat sulineri aamma tatigisariaqarlugit, taamaammallu ininik attartortitsisarnermut tunngatillugu nassuiaataat tatigisimallugit.

- Imminut illersorsinnaanngilaq atorfilittat namminerisamik sulinerat tamaat uanga akisussaaffittut tigussagukku, Charlotte Ludvigsen sapaatiummat oqarpoq.

Kommunalbestyrelsip ineqarnermut tunngatillugu suliaq marlunngornermi unnukkut suliarissavaa. Ingerlatsiviup tassunga atatillugu inassutigaa, Nakkutilliisoqarfiup aalajangiinera tusaaatissatut tiguneqassasoq.

Sermitsiaq.AG-mit suliaq pillugu Charlotte Ludvigsen oqaaseqartinniarneqaqqippoq.

Powered by Labrador CMS