Siumut: Naalakkersuisut akissuteqarnerminni paatsiveerussaaripput
Illersornissap iluani ilinniagaqarniarneq pillugu Naalakkersuisut assigiinngitsunik akissuteqarnerat Siumup paatsiveqartinngilaa. Pele Broberg aamma Peter Olsen paragraf 37 naapertorlugu apeqquteqartoqarnerani imminnut assortuuttunik akissuteqartut, Doris J. Jensen erseqqissaavoq.
Akissut sorleq eqqortuua sorleq eqqunngila? Taama Siumup ilinniartitaanermut oqaaseqartartuat Doris J. Jensen Naalakkersuisunut allakkamik ammasumi aperivoq.
Kalaallit inuusuttut sakkutuussatut misilitsinnermut atatillugit angalanissaat ineqarnissaallu Naalakkersuisut tapersersortarneraat Pele Brobergimut paragraf 37 naapertorlugu apeqquteqartoqarmat, Nunanut allanut Naalakkersuisoq ima akivoq:
- Aalajangersakkami allassimasutut kalaallit ilinniagaqarniartut sakkutuussatut misilitsinnermut atatillugu angalanernut aningaasartuutisisinnaapput najugaqarnerminnullu tapiiffigineqarsinnaallutik, Pele Broberg juunip 18-ani 2021-mi ilaatigut taama akissuteqarpoq.
Allanngortitseriasaarneq
Ilinniartitaanermut Naalakkersuisoq, Peter Olsen assinganik aperineqarpoq. Demokraatineeersoq Anna Wangenheim tassani apeqquteqaqqittuuvoq. Namminersorlutik Oqartussat sakkutuussattut misilitsinnermi tapersersortarneraat aamma apeqqutigalugu. Tassanilu Peter Olsen misilitsinneq oqaaseq "ilinniakkat" ataaniinngimmat tapersersorneqarneq ajortut akissuteqaatigalugu.
- Taamaalilluni sakkutuujuffissami atuunneq ilinniagaqarnersiutit pillugit inatsimmi isumagineqartut tunngavigalugit ilinniarnertut isigineqanngilaq. Tamanna
tunngavigereerlugu, sakkutuujuffissami atuunnermut matumani ilanngullugu sakkutuujusussaatitaanermut misilitsinnermut atatillugu angalanermut qanorluunniit
ilinniagagarnersiutit tunniunnegarsinnaanngillat, Ilinniartitaanermut Naalakkersuisoq juulip 13-ani akissuteqarnermini taama allappoq.
Akissutit eqqunngitsut akuersaarneqarsinnaanngillat
Akissutit taamak assigiinngitsiginerat Siumut tupigusuutigaat. Naalakkersuisut eqqortunik Inatsisartunut paasissutissiissarnissaat Doris J. Jensenip noqqaassutigaa. Tamannami inatsisaavoq.
- Inatsisit malillugit Naalakkersuisoq eqqunngitsumik paasissutisseeqqusaanngilaq, uanilu akissuteqaatini marlunni takuneqarsinnaavoq eqqunngitsumik Inatsisartunut paasissutissiisoqarsimasoq tamannalu akuerineqarsinnaanngilaq aammalu kinguneqartinneqartariaqarpoq, Doris J. Jensen Naalakkersuisunut ammasumik allakkami taama allappoq.