Siumut: Marlunnik qinigaaffillit pisariaqartippagut

Siumut sinnerlugu taasisinnaasut amerlanerussuteqartut nuna tamakkerlugu 2017-imi ataatsimeersuartoqarmat aalajangerpyt marlunnik qinigaaffeqarneq atorunnaassasoq. Tamanna isumaqarpoq politikerit Inatsisartuni aamma kommunalbestyrelseni qinigaaffeqarunik, sorlermi sulinissaminnik toqqaasariaqartalissasut.

Partiilli maleruagassaanni paragraf aalajangersimasoq atorlugu, partiip siulersuisuuneri amerlanerussuteqartut aalajangingaannit allaanerusumik iliorsinnaapput.

Partiillu ilaasortaasa naatsorsuutigisariaqarpaat siulersuisuunerit 2020-mi ataatsimeersuartoqarnissaanut siunnersuuteqassasut. Siunnersuutip partiimi marlunnik qinigaaffeqarsinnaaneq atuutseqqilissavaa, partiip allattaanera Mikael Petersen oqarpoq.

- Marlunnik qinigaaffeqarneq atorunnaarsikkutsigu, taava pissaaneq sunniisinnaanerlu annaassavagut, soorlu Inatsisartuni kommunalbestyrelsenilu. Pissutsillu maannakkutut itsillugit tamassumunnga akissaqanngilagut, Mikael Petersen nassuiaavoq.

Isumassarsiatsialaagaluarpoq – pappialatigut

Siumut Inuusuttai Sermitsiaq.AG-mut ilisimatitsigaluarput politikerit marlunnik qinigaaffeqarnissaat tulluanngitsoq, siulersuisuunerilli tamanna isumaqatiginngilaat.

Mikael Petersen nassuerpoq marlunnik qinigaaffeqarnerup atorunnaarsinnissaa pillugu isuma tusarnersinnaagaluartoq.

- Piviusulli malissagutsigit taamaasiorutta partii sanngiillisassavarput. Pingaartumik Inatsisartuni amerlanerussuteqarneq taama annikitsigitillugu. Nassuerutigisariaqarparput atorunnaarsitsineq kukkunerusoq, taamaammat tamanna aaqqittariaqarparput, oqarlunilu partiip maleruagassai malillugit amerlanerussuteqartut aalajangigaat siulersuisut malittariaqanngikkaat.

Politikerit Siumut tunuliaqutaralugu marlunnik qinigaaffillit pingasuupput, tassa Laura Taunajik Kommuneqarfik Sermersuumi ilaasortaq, Henrik Fleischer Qeqqata Kommuniani ilaasortaq aamma Anders Olsen Kommune Kujallermi ilaasortaq.

Sermitsiaq.AG atuartartunik isumasiuimmat 769-it peqataapput, taakkunannga 707-t isumaqarput marlunnik qinigaaffeqarneq atussanngitsoq. 62-it isumaqarput marlunnik qinigaaffeqarneq ajunngitsoq.

- Politikerit marlunnik qinigaaffeqassanerlutik namminneq aalajangissavaat, tamanna pisinnaatitaaffigaat. Partiimiit anisissinnaanngilagut taamaaliorpata. Qinersisartut namminneq aalajangissavaat politikeri marlunnik qinigaaffeqarusuttuusoq qinissanerlugu, Mikael Petersen oqarpoq.