Siumut: Kommuneqarfik Sermersooq ingerlatsiunnaarsinneqassava?
Kommuni qulaatiinnarlugu Danmarkimit ikiorserneqarnissamik Inatsisartut aalajangiinialernerat, Peter Davidsenip kommunimi Siumup gruppianeersup isornartorsiorpaa.
Tasiilami meeqqat atugaat iluarsineqarnissaat, piviusulersaarummi 'Byen hvor børn forsvinder'-imi oqaluttuarineqartutut, kommunip akisussaaffigaa. Peter Davidsen, Kommuneqarfik Sermersuumi Siumup gruppiani siulittaasoq taama oqarpoq.
- Kommunip inunnik isumaginninnermi pisussaaffini kivissinnaanngikkuniuk akisussaaffeqarpoq Naalakkersuisunut ikioqqullutik saaffiginnissallutik, taanna tusagassiuutinut nalunaarummi taama allappoq.
- Borgmester Asii Chemnitz Narup (IA) aamma 1. viceborgmester Randi V Evaldsen (D) inunnik isumaginninnermut tunngatillugu suliat killiffii tunngavigalugit ikiortissarsiornissamik pisariaqartitsivugut?
Pivusulersaarummi ajornartorsiutit apeqqutillu qaqinneqartut kommunalbestyrelsip oqaluuserinissaanut suli periarfissaqarsimanngitsut, Peter Davidsenip maluginiaqquaa.
- Maannalu Inatsisartuni partiit amerlanerussuteqartut piumasarilerpaat Qallunaat Nunaannut Naalakkersuisut ikioqqullutik saaffiginnissasut, tamannalu paasineqarsinnaavoq kommune qulaatiinnarlugu piumasaqarnertut – allatut paasillugu kommunip akisussaaffii qulaatiinnarlugit inatsisartut iliuuseqarusupput.
- Inatsisartut ikioqqullutik kissaateqartut apererusunnarput: ”Kommuneqarfik Sermersooq inunnut isumaginninnermut tunngatillugu Naalakkersuisuniit nakkutigineqalissava, kommunit aqunneqarnerat pillugu Inatsisartut inatsisaat nr.22, 18. November 2010-meersoq tunngavigalugu?”.
Siumup gruppiata suliniutit killiffii paaserusuppai
Peqqissutsimut isumaginninnermullu naalakkersuisup, Martha Abelsenip (S) ippassaq tusagassiuutinut nalunaarummi erseqqissumik nalunaarutigaa – pisariaqassappat – kommunit nakkutigilernissaannut piareersimalluni.
- Maanna isumaginninneq pillugu malittarisassanik tamanik ilaanilluunniit kommunip ingerlatsineranik atorunnaarsitsinissamut inatsisitigut periarfissaqareerpoq, kommunip pisussaatitaaffiinik imaluunniit innuttaasut pisinnaatitaaffiinik annertuumik sumiginnaasoqarsimappat, taanna taama nalunaaruteqarpoq.
Ajornartorsiutit qanoq iliuuseqarfiginissaat aamma Namminersorlutik Oqartussanit ikiorneqarnissaq pisariaqartinneqarnersoq paasissallugu kommuni nukingertariaqartoq, Peter Davidsen (S) isumaqarpoq.
- Siumut Kommuneqarfik Sermersuumi kissaatigaarput Tasiilami Nakkutilliinermut nalunaarusiaq 2016-imeersoq tunngavigalugu malitseqartinneqarnissaanut suliniut kommunip Naalakkersuisullu suleqatigiillutik aallartitaat naammassisinnaanerlugu nalilersuiffigisariaqaripput.
- Una qulaani ilanngussaq malitseqartitsinissamut suliniut piaarnerpaamik kommunemi amerlanerussuteqartuniit suliniutit/suliat killiffiat pillugu nassuiaasoqartariaqarpoq pisortatigoortumik.