Siumut Uummannaq: Siulittaasumik qinersinissaq kinguartinneqarli
Siumut Uummannami immikkoortortaqarfiata, immikkoortortaqarfiit allat assigalugit, kissaatigaa partiip ataatsimeersuarnissaa siulersuisuunerit ukiamut nuutsissagaat.
Uummannami Siumup immikkoortortaqarfiata siulersuisuunerit aalajangernerat isumaqatiginngilaat. Tassami aalangerneqaraluarpoq siulittaasussamik qinersineq partiillu politikkia pillugu oqallinneq immikkoortillugit ullulerneqassasut:
- Maannakkut siulittaasumik toqqaariarluta partiip politikkia pillugu aappaagu oqallinnissarput ataqatigiinngillat. Oqallinneq siulittaasussamillu qinersineq atasussaapput, siulittaasunngortussap suut suliniutigissanerai paasiniassagatsigu, immikkoortortaqarfiup siulittaasua Johannes Mathiassen, Sermitsiaq.AG-mut oqarpoq.
Immikkoortortaqarfik taamaasilluni Siumumi immikkoortortaqarfiit allat isumagatigai. Tassa siulittaasumik qinersinissaq ukiamut nuutsinneqarnissaanik piumasaqarsimapput, tassa inuit katersuunnerulersinnaanerat utaqqimaarumallugu.
Partiip nuna tamakkerlugu ataatsimeersuarnissaa ilaasortanit 65-init peqataaffigineqartussaq Ilulissani juulip aallartinnerani pisussaagaluarpoq. Coronalli ajornartoortitsinera pissutigalugu siulittaasumik qinersinissaq Nuummut nuunneqarpoq, ornigarneqarsinnaanngimmalli oqarasuaatikkut digitalikkullu ingerlanneqartussanngorluni.
Partiip politikkia pillugu oqallinnissaq aappaagumut nuunneqarpoq.
Siulittaasussarsiorneq nuunneqarli
Siumut Uummannami siulersuisut nutaat ataatsimiinnerminni tullermi aalajangissapput siulittaasunngorniuttuni kina tapersersussallugu. Vivian Motzfeldt, Erik Jensen aamma Kim Kielsen siulittaasussatut sassarniarlutik nalunaaruteqareerput, siulittaasumillu toqqaanissaq juulip quliganut nuunneqarsimalluni.
- Immikkoortortaqarfiit arlallit assigalugit siulittaasussarsiorneq politikkimillu oqallinneq ataatsimoortikkumallugit Nuummi septemberillu 12-ani pisussanngortikkumallugit kissaateqarpugut. Taamanikkussamut ataatsimoorsinnaanerup killilerneqarsimanera qaangiutereersimassagunarpoq, Johannes Mathiassen naggasiivoq.
Immikkoortortaqarfiit siulersuisuunernit sapaatip akunnerata naanerani oqarasuaatikkut ataatsimiinnissamut neqeroorfigineqarsimapput. Nuna tamakkerlugu ataatsimeersuarnissap nuutsinneqarsinnaanera tassani oqaluuserineqassaaq.