Siumut - Siumut?

Unamminissarsuaq qanilliartorpoq. Siumumi siulittaasumik qinersineq. Partiip iluani aaqqiagiinnginneq nunap sinneranut sunniuteqarpoq, taamaattumillu siulittaasumik qinersinerup kingorna piffissaq Kalaallit Nunaata sinneranut pingaaruteqarpoq. Siumup atorfissaqartitai Kalaallit Nunaata atorfissaqartippai? Siumut siunissami isumaqassava siumut?

Piareersimapput, unamminerlu ingerlanneqassaaq. Siulittaasumik qinersineq, qinigassanngortittut pingasut, ajugaasussaq ataaseq. Aviisi AG aviisimi politikkikkut isummersortartup Palle Christiansenip isumaa pillugu taamatut allappoq.

Kim Kielsen 2014-imiilli partiimi Siumumi siulittaasuusimavoq. Taanna siulittaasunngorpoq, pisarnertut Siumumi aaqqiagiinngitsoqareernerata kingorna. Ajornartorsiornerit mamianartuliornerillu partiimi atugaasimapput, Kim Kielsenilu eqqissinermik ataqatigiinnermillu pilersitsisussaasimavoq.

Aammami aallaqqaammut taamaappoq.

Taava ulluinnaat pissusiviusullu atugaalerput, matumanilu qanoq iliuuseqartoqartariaqarpoq.

Siumut avataanit isigalugu namminermisut isikkoqarpoq. Alapernaarsuisutut takuneqarsinnaavoq partiip iluani pisut nunamut politikkimut ingerlanneqartumut sunniuteqartut. Tassami qineqqusaarnermi suut tamarmik atorneqarsinnaapput.

Inissisimaneq

Kielsenillu unammillertai kikkuuppat?

Marluullutik Inatsisartunit misilittagaqartuupput, taamaattumik nuna tamakkerlugu politikkersorneq nalunngilaat, aammattaarli Siumup iluani pissaaneqarniunneq ilisimalluguttaaq.

Vivian Motzfeldt ullumikkut Inatsisartuni siulittaasuuvoq. Tassanngaanniit politikkikkut pingaartitaminik ingerlatsisinnaasimavoq, namminerlu partiimini siulittaasuminut sulisitsisutut inissisimalluni. Tamanna takuarput coronap Kalaallit Nunaannut anngunnera pissutigalugu Inatsisartuni upernaakkut ataatsimiinnissaq ingerlanneqarsinnaanersoq aaqqiagiinngissutaalermat.

Kim Kielsen naaggaarpoq, Vivian Motzfeldtillu ataatsimiinneq ingerlanneqaqquvaa, ilisimaneqartutullu ataatsimiineq ingerlanneqarpoq. Taamaasilluni takuneqarsinnaavoq Inatsisartuni siulittaasuuneq anguniakkanik sorsuutiginninnissamut aallaaviulluartoq.

Torrallaavoq

Unammillertup aappaa tassaavoq Erik Jensen, taannalu ullumikkut Inatsisartunut ilaasortaavoq, aammattaarli Naalakkersuisunut ilaasortaasimalluni. Taamaasilluni unamminissaminut misilittagaqarpoq aallaavissaminik. Erik Jensen siorna novembarimi siullersaalluni siulittaasumut qinigassanngortinniarluni nalunaaruteqarpoq, taamani Kim Kielsen nalunaaruteqarmat 2020-imi Siumup ataatsimeersuarnissaani siulittaasutut qinigassanngorteqqinniarnani.

Taamaasilluni Kim Kielsen silatusaarpoq.

Politikkersornermi ilinniagassatoqaavoq arlaannik avammut nalunaaruteqartarneq, takullugulu kina tamatumunnga qisuariarnersoq. Erik Jensen siullersaalluni siulittaasumut qinigassanngortippoq, taamaasillunilu takuneqarsinnaalerpoq partiimi isorlerni sorlerni ilaanersoq, kikkunnillu tapersersorneqarnersoq.

Tamanna aamma takuneqarsinnaavoq Vivian Motzfeldt qinigassanngortimmat.

Tassuunakkut takuneqarsinnaalerpoq Siumumi isorliit kikkuunersut, tamatumalu kingorna Kim Kielsenip takusinnaalerpaa siulittaasutut qinigassanngorteqqiinnaruni qularnanngitsumik pissaaneqarneq tigummiinnarsinnaallugu. Taamaasiorporlumi amerlanerpaat tupaallaatigisaannik. Kim Kielsen silatusaarpoq.

Tunuatigut unammineq

Qineqqusaarneq saqqumilaanerpaajusimanngilaq. Partiip iluani ingerlanneqartorujussuusimasinnaavoq nuna tamakkerlugu sianeqattaartarluni, imaluunniit Nuummi ataatsimeersuarnermi aatsaat unammersuartoqassaaq.

Nalinginnaasumik inuit nettimi naapittarfii atorneqangaatsiartarput, taama pingaaruteqartigisumik siulittaasunngorniunneq pineqaraangat, qinigassanngortittulli taakkua pingasut tamakkunatigut nipangersimalluinnarsimapput.

Pisarnertut imminnut ajortisarnialaartarsimapput, kisiannili arlaannaalluunniit qineqqusaarummik saqqummiussisimanngilaq, takuneqarsinnaalluni Siumut Kalaallillu Nunaat sumut ingerlatinniarnerlugu.

Qinigassanngortittoq, politikkimik saqqummiussisartutuaasimasoq tassaavoq qinigassanngortinnerminit tunuartoq. Johan Arne Fleischer.

Taanna tassaasimavoq »inuk ilisimaneqanngitsoq«, »inuk minguitsoq«, qoqassiilluni tunuanit ajugaasimasinnaagaluartoq, Siumup kissaatigisimasuuppagu partii nukinik nutaarluinnarnik siuttoqalissasoq. Taassuma Facebookimi quppernermini sammisaqarfiit soorlu nunaqarfiit, attaveqaatit, innuttaasut atugassarisaat, nunani tamalaani politikki aningaasaqarnerlu sammisarsimavai. Neriuutigissavarput siunissami imaalerumaartoq qineqqusaartoqartassalluni, taamaasilluni politikkikkut anguniakkat oqaluuserineqarlutik, politikkip qanoq iluseqarnera imaluunniit inummik saassussinerit kisiisa pinnagit.

Kina ajugaassava?

Suut tamaasa eqqarsaatigalugit ajugaasussaq tassaassaaq nunaqarfinnit tapersersorneqartoq nukittunerpaanillu attaveqarfilik.

Siulittaasutut inissisimasoq tamatigut amerlanerpaanik saassunneqaatissaqartarpoq. Nipisanut tunngasoq kinguneqarsimanngitsoq. Timmisartut orsussaannut tunngasoq kinguneqarsimanngitsoq ilaalu ilanngullugit.

Tullinnguuppoq kina sunalu toqqassallugit piumaneqarnerunersoq. Ilisimasaq, qularnannginnerusoq, aamma tullianik Inatsisartunut qinersinermi ajugaasinnaassagunartoq, toqqarneqassava? Imaluunniit kinguaariit nikisinneqarnissaat toqqarneqassava, taamaasillunilu Siumup, taamaasillunilu Kalaallit Nunaata, ingerlaffiata iluarsineqarnissaanut periarfissaq annertusillugu?

Kina ajugaassanersoq ilimagaara?

Akissutissaa eqqornerusoq tassaavoq Kim Kielsen. Qinersivimmi maanna ingerlasumi Siumup immikkoortoqarfiinit 40-uusunit, 34-inik taperserneqarsimavoq. Ilimagilluinnarpara taassuma Naalakkersuisuni akerlilersortini peersissimagai, tapersersortinilu ikkullugit.

Ataatsimeersuarnermi aallartitat 65-iupput. Immikkoortoqarfiit 40-t taasisinnaatitaallutik. Naalakkersuisunut ilaasortat arfinillit. Siulersuisuunerni ilaasortat arfinillit.

Aallartitanit 65-iusunit Kim Kielsen maannangaaq ikinnerpaamik 42-nit tapersersorteqarsinnaassaaq, immikkoortoqarfinnit 34-init + Naalakkersuisunut ilaasortanit arfinilinnit + siulersuisuunerni ilaasortanit ikinnerpaamik marlunnit, taamaasillunilu qinigaaqqissaaq. Taamatut eqqoriaavunga.

Siunissaq

Kim Kielsenili ajugaassagaluarpalluunniit tatineqarneq peerunnavianngilaq. Decembarip aallaqqaataani unammilligassat massakkut unammilligassat assigilluinnarpai.

Piffissami siulittaasuuffiusussami aggersumi arlalinnik qinersisoqartussaavoq, pingaarnerpaartaallu tassaavoq Inatsisartunut qinersineq.

Qinersinermi tassani Kim Kielsen imaluunniit siulittaasunngortoq alla ajorsassagaluarpat Siumumi nutaamik aalassassimasoqalissaaq, siulittaasorlu siulittaasutut tunuartariaqassaaq.

Nutaamik siulittaasunngortussamut qinigaaqqittumulluunniit suliassaq tassaavoq nunatsinni aningaasarsiornerup ingerlalluartilernissaa, tamanna sammisaqarfinni allani tamani siuariartornermik pilersitsissammat. Aningaasarsiorneq annikilliartorpat tamanna Landskarsimut annertunerusumik tatisilissaaq, tamannalu aamma inuiaqatigiinnut annertunerusumik tatisileqqissaaq, tatineqarnerlu tamanna Naalakkersuisut siulittaasuannut issimasumut utertinneqassaaq.

Siumumi isumaqatigiissuteqartoqarsinnaappat taanna tassaavoq isumaqatigiinneq tamanna Siumumit pissasoq. Siumut partiiuvoq pissaanermik tigumminnittoq. Pissaaneq annaaneqarpat partiip iluani aaqqiagiinngitsoqaqqilissaaq.

Kissaatigisaqarsinnaasuuguma taanna tassaassagaluarpoq Siumuup qummut qiviarnerulaarnissaa. Kalaallit Nunaata siluarsuaq avatitsinniittoq atorfissaqartippaa. Kalaallit Nunaata aningaasaliissuteqarnerit atorfissaqartippai, siuariartorneq, sammisaqarfinnik allanik kivitsisussaq, aallartinniarlugu.

Kalaallit Nunaat pisuunerulernavianngilaq »kalaalivik« suunersoq nassuiartuaannarniaruniuk. Kalaallit Nunaata atorfissaqartinngilaa oqaatsitigut piumasaqarnissaq, aqagu Kalaallit Nunaannik matusisussamik, taanna ingerlaannavik ingerlanneqalissagaluarpat.

Kalaallit Nunaata atorfissaqartippaa Siumup aterminik malinnissasoq – siumut!

Powered by Labrador CMS