Skip to main content

Siumut sinnerlugu taaguunneqarluarsimasoq hashi pillugu eqqartuunneqarsimavoq

Siumut sinnerlugu taaguunneqarluarsimasut ilaat Qarsoq Høegh-Dam pinerluuteqarsimasutut suliarineqarsimavoq, apeqqutaalerporlu Qinigaanerup misilinneqarnissaanut ataatsimiitsitaliaq suliamik misissuissanersoq, politikkerimmi pineqartup Sermitsiaq.AG-mut ullumi erseqqissaatigisimavaa pillagaasimanngitsutut allagartaqarluni.

Piffissami sivisuumi eqqartuussivimmi suliaqartoqareersoq – siullermik Najukkami eqqartuussivimmi kingusinnerukkullu Nunatta Eqqartuussiviani – nuna tamakkelugu politikkerinngorlaaq 2019-imi oktobarip qaammataani 1.500 koruuninik akiligassinneqarsimasoq hashimillu 49 grammimik arsaagaasimasoq pillugu suliaq suliareqqitassanngortinneqarsimavoq.

Najukkami eqaartuussiviup uppernarsarpaa, Qarsoq Høegh-Dam hashimik 49 grammiusumik politiit Qarsup angerlarsimaffiani nassaarisimasaannik tuniniaaniarluni siunertaqarsimasoq. Tamatuma malitsigisaani pineqartoq sapaatip akunnerani pinerluuteqarsimasut inissiisarfianiittussanngorlugu ukiumilu ataatsimi nakkutigineqartussatut eqqartuunneqarsimavoq, tamatumalu saniatigut 4.900 koruuninik akiligassinneqarlunilu hashimik arsaagaasimavoq.

Suliaq suliareqqitassanngortinneqarsimavoq, Nunattalu Eqqartussivianit suliaq allatut isigineqarsimasoq, nunatta eqqartuussiviata allagaataani Sermitsiaq.Ag-mit pissarsiarineqarsimasumi tamanna atuarneqarsinnaavoq.

Nunatta Eqqartuussiviani tunngavilersuutinit tigulaakkat:

- Unnerluunneqartup nassuiaatigisimavaa, hashi taxamini ulloq 16. oktober 2015 nassaarisimallugu, politiinullu tunniunnissaa eqqarsaatigalugu kaasarfimminut ikisimallugu. Politiit ulloq 20. oktober 2015 unnerluutigineqartup angerlarsimaffiani misissuinerminni hashi nassaarisimavaat.

- Unnerluutigineqartup hashi qanorluunniit pissarsiarisimagaluarpagu Nunatta Eqqartuussia isumaqarpoq, 2015-imi oktobarip 20-ani hashimik tigummiagarneq inatsisinik unioqqutitsinerusoq. Nunatta Eqqartuussivianit pingaartinneqarpoq, ulluni sisamani hashimik tigummiagaqarsimanermi unnerluunneqartoq akisussaassuseqartoq. Unnerluunneqartup napparsimasoqarnera oqqassimanerlu pissutigalugit hasimik politiinut tunniussisimannginnerminik paasissutissiissuteqarsimanera allatut inernilerneqarsinnaanngilaq. Unnerluunneqartoq taamaalilluni inatsisinik unioqqutitsilluni hashimik tigummiagaqarsimagami pisuutinneqarpoq.

- Nunattali Eqqartuussivianit uppernarsineqanngilaq tuniniaaqqinnissamik siunertaqarluni tigummiaqarsimanersoq. Nunattalu Eqartuussiviata naliliinermini tunngavigaa, haship tuniniarneqarnissaamit takussutissaqanngitsoq, soorlu aamma unnerluunneqartoq ikiaroornartut pillugit inatsimmik unioqqutitsisimasutut pineqaatissinneqarsimanngitsoq. Poortorluakkamik nassaarneq imminermini hashimik tuniniaanissamut naammattumik uppernarsaataanngilaq.

Eqqartuussivik 10-49,9 grammimik tigummiagaqaqqaarnermut 3.000 koruuninik akiligaasiisoqarnissaanik pineqaatissiivoq, sulialli piffissami sivisuallaami suliarineqarsimanera pissutigalugu akiligassiissut 1500 koruuninut appartinneqarpoq. Tamatuma saniatigut hashi 49 grammi arsaarinnissutigineqarpoq.

Pillagaasimanngitsutut allagartaqartoq

Sermitsiaq.AG-mit Qarsoq Høegh-Dam aperineqarsimavoq, taamatut ittumik eqqartuussivimmi suliaqartoqarsimasoq Inatsisartunut qinigassanngortissimanini qanoq isumaqarfigineraa.

Politikkerip inuusuttup ”Inuttut pillagaasimannginnermut uppernarsaat” naalagaaffimmi politiit pisortaanit Thorkild Fogdemit pissarsiarisimasani Sermitsiaq:AG-mut nassiussimavaa, tassanilu allassimavoq Qarsoq Høegh-Dam ”pillagaasimasutut nalunaarsorneqarsimanngitsoq”.

Tamatumunnga tunngaviuvoq, assersuutigalugu aanngajaarniutit pillugit immikkut inatsit malillugu pinerluuteqarsimasunut inissiisarfimmiittussanngortitsilluni eqqartuussisisimagaanni pillagaasimanerit kisimik pillagaasimasutut allagartamut ilanngunneqartarnerat, tassa akiligassinneqarneq pineqaraangat pillagaasimanngitsutut uppernarsaammik tunniussisoqartartoq. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER