Siumut sinnerlugu qinigassanngortissimasoq partiimit anisoq
Akitsinnguaq Olsen Siumut sinnerlugu Inatsisartunut qinigassanngortissimasoq, Avannaata Kommuniani borgmesteriujunnaartoq Palle Jerimiassen assigalugu partiimit anisimavoq.
Siumut ilaasortamik apriilip arfernani Inatsisartunut qinigassanngortissimasumik annaasaqarpoq.
Akitsinnguaq Olsen tusagassiorfinnut naatsumik nalunaaruteqarluni allappoq:
- Partiimit ataatama pilersitseqataaffigisimasaanit maanna anivung, politikki pinnagu nammineq inuttut anguniakkat sammineqarnerusalermata.
Akitsinnguaq Olsen, Moses Olsenimik ataataqartoq Inatsisartunullu ilaasortaasimasoq aalajangernini pillugu imatut nassuiaateqarpoq:
- Innuttaasut oqartussaaqataanerlu puigorneqarlutik tunullinngortinneqartarput. Tamanna qissaarnaannarpoq, tamatumunngalu uanga peqataarusunngilanga, Siumumi ilaasortaasimasoq apriilip arfernani qinersisoqarmat 16-inik taaguunneqarsimasoq erseqqissaavoq.
Politikkikkut sangujoraartumik ingerlasimasoq
Akitsinnguaq Olsen politikkikkut sangujoraartumik ingerlasimavoq, 2005-imi Siumut sinnerlugu qinigassanngortikkami 43-nik taaguunneqarsimavoq, 2009-imi IA sinnerlugu Inatsisartunut qinigassanngortippoq, tassanilu inuttut 112-inik taaguunneqarsimalluni. Tamatumalu kingorna Siumut uteqqippoq, siusinnerusukkutulli taaguunneqarpallaarani.
Aamma 2011-mi Siumut sinnerlugu Folketingimmut qinigassanngortippoq, taamanikkulli Siumut sinnerlugu qinigassanngortittut sisamaasut akoranni 458-iinnarnik taaguunneqarluni.