Siumut Sermersooq: Paasissutissanik pissarsiniarneq ajornartoq
Kommuneqarfik Sermersuumi Siumut gruppianni siulittaasoq Peter Davidsen oqarpoq, kommunalbestyrelsimi ikinnerussuteqartut aningaasaqarneq pillugu paasissutissanik pissarsiniarnerat ajornartoq. Borgmesteri isornartorsiuinermut akerliivoq.
Kommuneqarfik Sermersuumi kommunalbestyrelsi aappaagumut missingersuutissat pillugit isumaqatiginninnialeruttorpoq.
Kommunalbestyrelsimi ilaasortaq Peter Davidsen, Kommuneqarfik Sermersuumi Siumut gruppianni aamma siulittaasuusoq isumaqatiginninniarnermut atatillugu kommunalbestyrelsimi amerlanerussuteqartunik sakkortuumik isornartorsiuivoq.
- Assersuutigalugu inissiat aserfallatsaalineqarnissaannut aningaasat atorneqartussat ukiuni aggersuni 15 millioner koruunit missaannik annertunerulersussaapput, soorli annertunerulernissaat nassuiarneqarsimanngilaq. Siullermeerinninnermiluunniit atorfilittanut apeqquteqarsinnaatitaanngilagut. Kommunalbestyrelsimili amerlanerussuteqartut siunnersuut aappassaanik suliarineqarnissaanut innersuussutigaat, tamatuma qanoq imminut ataqatigiinneranik paasissutissinneqarata, taanna Sermitsiaq.AG-mut oqarpoq.
Borgmesterip Charlotte Ludvigsenip (IA) Peter Davidsenip isornartorsiuinera paasisinnaannginnerarpaa.
- Atorfilittat siullermeerinninnermut peqataapput, tassani aningaasaqarnermut pisortaq maanna qanoq inissisimasoqarneranik saqqummiussivoq. Pineqartoq tikikkatsigu Peter Davidsen suliani pissutigigunarlugit ataatsimiinnermut peqataajunnaarsimavoq. Aamma aningaasaqarnermut tunngatillugu apeqquteqarnissamut periarfissaqartitsisoqarpoq, borgmesteri oqarpoq.
Matoqqavallaartumik ataatsimiittoqartartoq
Siumut gruppianni siulittaasup ataatsimiinnerit ingerlanneqartarnerat isornartorsiorpaa.
- Ataatsimiinnerit matoqqavallaaqaat, innuttaasut susoqarneranik malinnaanissamut periarfissaqartinneqanngillat. Tamanna uggornarpoq, innuttaasorpassuimmi missingersuutit qanoq ingerlanneqarnersut pillugu soqutiginnipput. Missingersuutit isumaqatiginninniutigineqarneranni kommunimi atorfilittanut pissutsit qanoq imminnut ataqatigiinnersut apeqqutiginissaannut periarfissaqartarpugut, matumanilu innuttaasut malinnaanissamut periarfissaqartinneqanngillat, tamannalu ajorpallaarpoq, taanna oqarpoq.
Charlotte Ludvigsenip oqaatigaa, paasissutissat tamarmik pissarsiarineqarsinnaasut.
- Politikkikkut kissaatigineqartut siulliullugit saqqummiunneqartarput, aamma borgmesterinngoramali allannguisoqarnikuuvoq. Borgmesterinngunngikkallarama missingersuutit isumaqatiginninniutigineqarneranni aappassaanik suliarinninnermi kissaatigineqartut kingullertut saqqummiunneqartarput. Suleriaaseq nutaaq tamanna aamma Siumumit akuerineqarsimavoq, taanna erseqqissaavoq.
Isumaqatiginninniarnerit suli ingerlasut
Taamaammat isornartorsiorneqartoq ilisarisinnaannginnerarpaa.
- Aamma kommunalbestyrelsip ataatsimiinnissaa sioqqullugu ullormi sammisaqarnikuuvugut, tassani susassaqarfinni assigiinngitsuni pisortat peqataapput. Sammisaqarnermi kommunalbestyrelsimi ilaasortat apeqquteqarnissamut aamma periarfissaqarsimapput. Paasissutissat tamarmik kommunip nittartagaanut ilineqartarput, innuttaasut susoqarneranut taamaalillutik malinnaasinnaallutik. Isumaqatiginninniarnerilli matoqqasumik ingerlanneqartarput, isumaqatiginninniarnerillu naammassigaangata missingersuutissatut isumaqatigiissutaasoq saqqummiunneqartarluni. Suliaq suli ingerlavoq, sulilu isumaqatiginninniartoqarluni, borgmesteri Charlotte Ludvigsen oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...