Siumut qinersisoqarnissaanut tapersiivoq
Erik Jensenip erseqqissaassutigaa Siumut qinersisoqarnissaanut tapersiisoq. Innuttaasut politikkikkut ingerlatsinermut toqqissisimassappata tunuliaqutaasut eqqissisariaqarput.
Ukiuunerani ataatsimiinneq allartipoq, oqaluuserisassanilu normu 18 oqaluuserineqarluni. Oqarluuserisassaq qinigaaffiup atuunerani ukioq ataasiinnanngortoq immikkutittumik qinersisoqarnissaanut tunngatillugu saqqummiussaavoq.
Siulittaasoq Kim Kielsen oqaluuserisassap suliarineqannginnerani oqaaseqarumasimavoq. Periarfissaq tamanna atorlugu ukiuni kingullerni nammineq Naalakkersuisullu politikkikkut angusarisimasaat pillugit saqqummiussivoq.
- Isumaqatigiinngittoqartarsimavoq, aammali suleqatiginnikkusussuseqartoqarsimalluni, taamaammat angusaqarsimaqaagut, Kim Kielsen oqaluttarfimmit oqarpoq.
- Partiit sisamat immikkut ittumik Inatsisartunut qinersisoqarnissaanik nalunaaruteqarnerat ataqqivarput, naggasiilluni oqarpoq.
Erik Jensen qinersinissamut qilanaartoq
Kielsen oqaluttarfimmi oqaaqareermat Muté Bourup Egedep qinersineq pillugu inatsisissatut siunnersuut saqqummiuppaa, siunnersuummullu akerliusoqanngilaq.
Qineqqusaarnerlu aallartippoq. Qinersisoqarnissaanik siunnersuut suliluunniit taasissutigalugu naammassineqanngitsoq qineqqusaartoqalereerluni.
Erik Jensen partiit siulittaasuattut siullersaalluni oqaluttarfimmi oqaaseqarpoq.
- Politikkikkut inissisimaneq tulluussimaarutigisinnaanngilarput, allallu pinnagit immitsinnut avoqqaarisariaqarpugut. Amerlanerussuteqartunik katersiniarsimagaluarpunga, malittarisassavulli ileqqoreqqusavullu malissimavakka. Siumumi isummat assigiinngittaqaat assigiinngissutsillu inissaqartinneqartussaapput.
Sanaartugassat aallartinneqareersimasut qinersisoqareerpat ingerlatiinnarneqarnissaat kissaatigalugu oqarpoq.
Tamatuma kingorna Siumup siulittaasuata Siumup siunissami anguniagai saqqummiuppai, ilaatigut oqaatsinut, kulturimut Tunumilu pisassiissutinut tunngassuteqartut. Pineqartut innuttaasunit assortuussutaasaqisut.
Siumumi siulittaasup naggataatigut erseqqissaatigaa, qinersisoqareerpat Inatsisartuni kikkut issiassanerwsut innuttaasut aalajangingassarigaat.
- Pissaaneq innuttaasut tigummiarpaat. Innuttaasunut tusarnaartussaavugut, taamaammat Inatsisartunut qinersisoqarnissaanik kissaateqarneq tapersersorparput.
IA-mit ulloq qinersivissaq allannguutissatullu siunnersuut qularineqartut
Aqqaluaq B. Egede Inuit Ataqatigiinneersoq isumaqarpoq, apriilip arfernani kommunimut Inatsisartunullu ataatsikkut qinersisoqassanngitsoq.
- Qinersinerit taakku marluk akornanni anersaartorfissaqartariaqarpoq, politikkerit nutaat qineqqusaanermut malinnaassappata.
Aamma qinersineq pillugu Naalakkersuisut inatsisissatut siunnersuummut allannguutissatut siunnersuutaat isumaqatiginngilarput.
Allannguutissatut siunnersuummi pineqarput, coronap atuunnerani suliniutissatut pisariaqartinneqartut ingerlanneqarsinnaanerat, apriilillu arfernani qinersisoqareerpat aatsaat ingerlanneqalinnginnissaat aamma sanaartugassanik suliarinnittussarsiuussisarneq sanaartugassanillu isumatigiissuteqartarneq pillugit suliniutissat.