Siumut qinersisartunut tupaallatsitsisoq: Qallunaat aatsaat ukiut marluk qaangiunneranni qinersisinnaasariaqarput
Qinersisarnermut inatsit nutaaq suliarineqaleruttorpoq. Nunatta avataaneersut qinerseqataanissamut periarfissaasa ajornakusoornerulernissaannik Siumup kissaataa, partiinit arlalinnit tapersersorneqarpoq. - Kalaallit ikinnerussuteqalersinnaapput, soorlumi oqartoqartoq.
OBS naqqinneqarpoq sisamanngornermi nalunaaqutaq 18.50, Siumut Sermitsiaq.AG-mut saaffiginnippoq paasititsilluni siunnersuummi ukiut marluk pineqartut, ukiulli tallimat pineqaratik.
Inuinnaat naalakkersueqataanerat, Nunatsinni ullutsinni ilisimasarput qanganisaanngilaq. 1988 tassaanerarneqartarpoq, inatsisiliortuni amerlanerussuteqartut naalakkersuisuutitaqarnissaannik aaqqissuussinermik eqqussiffiusoq.
Ukiormi taanna Inatsisartut aamma Naalakkersuisut tamarmik immikkut siulittaasoqalerput, AG allappoq.
Taasisinnaatitaanissamut piumasaqaatit piffissami tamatumani allannguuteqarsimanngillat: Danmarkip naalagaaffianut innuttaasariaqarpoq, 18-inik ukioqalereersimasariaqarluni, Inatsisartunullu qinersinissaq sioqqullugu sivikinnerpaamik qaammatini arfinilinni nunami maani najugaqareersimasariaqarluni.
Tamannali naammappa?
Sivisunerusumik najugaqaqqaartoqassanngila?
Nalilersuisoqartariaqartoq
Naalakkersuisut Inatsisartunut qinersisarnermut inatsisissatut siunnersuummik Inatsisartunut saqqummiussimmata, apeqqut tamanna Inatsisartuni oqallinnermut sivisuumut naatsorsuutiginngisamik qitiutinneqarpoq.
Naatsorsuutigineqanngikkaluarluni qallunaat – allallu nunanit allaneersut – qinersisinnaatitaanerat inatsisinut ataqatigiissunut sammineqartunut ilaatinneqanngikkaluarmat; pineqartummi tassaagamik qarasaasiakkut allakkatigut taasinerit aamma partiip qinigassanngortissinnaanissaanut suut piumasaqaataanissaannut tunngasut.
Siumup qinersisarnermut tunngasoq saqqummiuppaa.
- Siumumit iserfiginngitsoorsinnaanngilavut qallunaat maanga nuuttartut qaammatit arlaqanngitsut maaneereeraangamik qinersisinnaatitaalersartut. Tamanna nalilersorneqaqqittariaqarpoq.
- Siumumit minikkusunngilarput danskit nunatsinnut nuuttut qaammatialunnguani nunatsinniittut aammalu sivisunngitsup iluani nunatsinniiginnartussat qinersisinnaatitaanerisa nalilersorneqartariaqarnerat. Immaqa ukiunik arlalinnik nunatsinniissimanissaq piumasaqaatinngortinneqarsinnaavoq, assersuutigalugu ukiut marluk, Siumup oqaaseqartitaa, Karl-Kristian Kruse oqarpoq.
Allaaserineqartoq aviisimi AG-imi tamakkiisumik atuaruk. Aviisi uani pisiarineqarsinnaavoq: