Skip to main content

Siumut Pele-p nalunaarutaa pillugu: Tupinnaqaaq

Siumumi siulittaasup Naalakkersuisut Kalaallit Nunaanni illersornissamut ilinniartitsinissamut tapersersuinatik nalunaaruteqarnerat tupallaatigaa.

Kalaallit Nunaanni dronit atorlugit nakkutilliisoqarnerulernissaa imaluunniit illersornissamut ilinniartitsisoqarnissaa Naalakkersuisunit soqutigineqanngilaq. Nunanut allanut Naalakkersuisoq Pele Broberg (PN) TV2-mut taamatut oqarsimavoq.

Taamatut oqaaseqarsimanera Siumumi siulittaasup Erik Jensenip tupaallaatigisimavaa.

- Naalakkersuisooqatigiissimasut ilaattut Kangerlussuarmi suliffisanik pilersitsiniarluta sulisimaqaagut. Illersornissamut ilinniartitaaneq ilaatigut suliatta ilagisimavaat.

- Eqqumiiginartoq tassaavoq, assigiinngitsutigut aningaasaliissutaasimasut naalakkersuisooqatigiit partiiata IA-p Folketingimi ilaasortaatitaata tamatumunnga tapersersuisimanera, Erik Jensen oqarpoq.

'Inuiaqatigiinnut iluaqutaassasoq'

Folketingimi partiit februaarip qaammataani isumaqatigiissutigivaat, Kalaallit Nunaanni danskit illersuinerat 1,5 milliarder koruunit nalingannut qanoq pitsanngorsaaffigineqarsinnaanersoq. Isumaqatigiissut malillugu aningaasanik ilaatigut droninut Kalaallit Nunaannik nakkutilliinerunissamut atugassanik kiisalu Kalaallit Nunaanni illersornissamut ilinniartitsisarnissamut atugassanik immikkoortitsisoqarsimavoq. Ilinniartitaaneq pilersaarut malillugu Kangerlussuarmi ingerlanneqartartussaavoq.

Taamanikkut Naalakkersuisunut siulittaasuusoq Kim Kielsen (S) isumaqatigiissut pillugu imatut oqarpoq:

- Ilulissani isumaqatigiissut tunngavigalugu sakkulersortoqarsinnaanera pinngitsoortissavarput. Nakkutilliinerup pitsanngorsaaffigineqarneranut aningaasaliineq sakkulersornerunngilaq, oqartussaaffigisattali inuiaqatigiinnut iluaqutaasussanngorlugu nakkutigineqarnissaa pineqarluni, tamannalu isumaqatigissummi takuneqarsinnaavoq, Kim Kielsen taamanikkut oqarpoq.

Pele Brobergilli isumaqatigiissutip imarisari maanna isornartorsiorpai:

- Naalakkersuisuusimasut Inatsisartuni amerlanerussuteqalaaginnartut imaassinnaavoq tusarniarneqarsimasut. Naalakkersuisunngortulli nutaat tamanna pillugu oqaloqatigineqarsimanngillat. Sakkulersortoqannginnissaa pillugu erseqqissumik periusissiaqarpugut, aamma Kalaallit Nunaanni dronit atorneqarnissaat, illersornissamut ilinniartitsisoqarnissaa danskilluunniit sakkutuuisa nunatsinniinnissaat soqutigisarinngilarput, taanna TV2-mut oqarsimavoq.

'Pelep Kangerlussuaq tunukkaa'

Erik Jensenip illersornissamut ilinniartitsisarnissamik pilersaarut piviusunngortinneqassanngippat uggornartorujussuunerarpaa.

- Soorunami tamanna uggornaqaaq. Suliffissanik pilersitsinikkut Kangerlussuup atorneqartarnera sakkunuut inuinnarnullu iluaqutaanerulertussaasoq, Naalakkersuisut siuliisa Danmarkimilu naalakkersuisut isumaqatigiissutigereerpaat.

- Isumaqarpunga Pele Brobergip Kangerlussuaq tunukkaa, Erik Jensen oqarpoq.

Erik Jensenip ilanngullugu innersuussutigaa, sakkulersortoqannginnissaanut tamatumalu kingunerisinnaasaanut tunngatillugit Naalakkersuisunut §37 naapertorlugu arlalinnik apeqquteqarsimalluni.

Sermitsiaq.AG-mit Pele Brobergip oqaaseqaataanut atatillugu Naalakkersuisut Siulittaasuat Múte B. Egede oqaaseqartinniarlugu sulissutigineqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER