Siumut partiip allatsissaanik nutaamik toqqaasimasoq
Miki Jensen 32-nik ukiulik Siumumi allatsissatut toqqarneqarsimavoq
Siumut Mikael Petersenip, kinguaassiuutitigut innimiilliorsimanini pissutigalugu suliunnaarsinneqarsimasup taartissaanik nassaarsimavoq.
Miki Jensen Aarhus Universitetimi kulturilerinermik tusagassiuutilerinermillu bacheloritut ilinniagaqarpoq, 2012-imiillu 2015-ip tungaanut Folketingimi Siumut ilaasortaatitaanut allattaasimalluni, tamatuma kingorna 2016-imiit 2019-ip tungaanut Folketingimi Nunatta Qitornaasa ilaasortaatitaanut allattaasimavoq allattoqarfimmilu pisortaasimalluni.
Miki Jensen 2017-imili Aarhusimi Kallaallit Illuata siulersuisuinut ilaasortaasimavoq, aamma Mind Your Own Businessip siulersuisuini ilaasortaasimalluni.
Piffissaq oqimaattorsiorfiusoq
Kalaallit Nunaanni partiit annersaanni allatsinngorlaaq 32-nik ukiulik mailikkut, partiimi ilaasortanut nassiussimasami imatut oqaaseqarpoq:
- Partii piffissami kingullermi oqimaattorsiorsimavoq, maannali siumut isigissaagut. Qulakkiissavarput aasaru ataatsimeersuarnerup ajunngitsumik ingerlanneqarnissaa. Politikkerit sulissastik suliarissavaat, tamatuma avataaniittut tamaasa uagut suliarissaqqaarpavut. Minnerunngitsumillu Siumumi ilaasortat, ataatsimeersuartut siulersuisullu aalajangingaasa naammassineqarnissaat qulakkiissavarput.
- Siumut partiiuvoq Kalaallit Nunaata oqaluttuassartaanut sunniuteqarsimaqisoq, ullumikkullu inuiaqatigiit inissisimanerannu ilusilersuisimasoq. Taamaammat nunami partiit annersaraat, partiiuvormi sineriak tamakkerlugu innuttaasunut paasinnittartoq. Partii akisussaaffimmik qimarratiginninnani tigusisartoq. Tamatumunnga akuulernissara qilanaaraara aamma isit nutaat nukiillu nutaat atorlugit ingerlariaqqinnissamut peqataanissara qilanaaraara.