Siumut Parisimut isumaqatigiissut sakkortuumik uparuarpaat
Parisimi isumaqatigiissutip nunatsinnut atuutsilersinniarneqarneranut tunngatillugu Inatsisartut peqataatinneqarnikuunngillat. Isumaqatigiissutilli qanoq kinguneqarsinnaanera aamma ilisimaneqanngilaq, Naalakkersuisut inatsisartunik ingiallorteqaratik sulimmata, Siumumiit ilaatigut taama isornartorsiuisoqarpoq.
Múte B. Egedep COP26-mi Glasglowimi oqalugiarnermini Kalaallit Nunaat Parisimi isumaqatigiissummut ilannguteriaananngortoq oqaatigereeraalu akunnialuit qaangiuttut illuatungiliuttut Siumut Naalakkersuisut suleriaaserisimasaanut sakkortuumik isornartorsiuipput.
- Parisimi isumaqatigiissutip nunatsinnut atuutsilersinniarneqarnera sakkortuumik uparuarparput – Inatsisartut avaqqullugit sulineq massakkorluinnaq unitsinneqassasoq kissaatigaarput, Siumumiit tusagassiuutinut nalunaarummi taama allapput.
Múte B. Egedep avammut nalunaarutaa Siumumi siulittaasup tullia Vivian Motzfeldtip pakatsissutigeqaa.
- Inatsisartut Naalakkersuisullu akornanni uppernassuseq tatiginninnerlu uani annertuumik aallaaviusariaqarpoq. Nunat tamalaat akornanni inatsisilerinermut tunngassuteqartuni annertuumik nunatsinnut kinguneqarsinnaasuni pitsaasumik tunuliaquteqarnissaq qinigaasimasullu tamaasa akuutinneqarnissaat uani pingaaruteqarluinnarpoq, Sermitsiaq.AG-imut taama oqarpoq.
Isumaqatigiissut sunik imaqarnersoq ilisimaneqanngilaq
Kalaallit Nunaata Parisimut isumaqatigiissummut ilaalernera ilumut nunatsinnut iluaqutissiisanersoq oqaatigiuminaatippaa, tassami Siumut suliami paasitinneqarsimanngilaq aalajangiunneqartorlu aamma apuuneqarsimanani.
- Ajunnginnersoq ajornersorluunniit oqaatigisinnaanngilara. Naluara sunaanersoq, oqarpoq nangiullunilu nassuiaatigalugu siuliani isumaqatigiissummut ilannguttoqassappat Kalaallit Nunaanut x millionit koruuninik akeqartussaasoq.
Danmarkip isumaqatigiissummi akisussaaffigisaat C02-millu aniatitsisoqarnerani killigititassaat Kalaallit Nunaanut attuumassuteqartinneqarnavianngitsut Naalajkkersuisut oqaatigaat. Tamannali siulittaasup tullersortaanut upperiuminaatinneqarpoq.
- 2015-imi isumaqatigiissuteqartoqarmat isumaqatigiissummi peqataannginnerput peqqutissaqarpoq. Nunat tamalaat akornanni isumaqatigiissuteqartoqarsinnaanngilaq arlaatigut pilliuteqarnianngikkaani. Taamaalilluni nunatsinnut arlaatigut kinguneqartitsisinnaavoq, Vivian Motzfeldt oqarpoq.
Suna allannguutaasanersoq massakkut paaserusuppaa
Kalaallit Nunaat Parisimi isumaqatigiissummi peqataalerneranut tunngatillugu Naalakkersuisut oqaatigaat nalunaarusiortoqarnerani kingunerit suugaluarnersut aallaavigineqarsimasut. Inatsisartuni Inatsisartullu ataatsimiititaliaanut saqqummiunneqarsimanngimmata Siumut tassani suna eqqartorneqarnersoq aamma ilisimanagu paasissutissiissutigaat.
Siumut isumaqarpoq, isumaqatigiissutip nunatta aatsitassarsiorneq eqqarsaatigalugu ineriartorneranut ajoqutaasasoq, 2015-imili tamanna pillugu isumaqatigiissummut nunarput atsioqataanngilaq.
- Naalakkersuisooqatigiit inuussutissarsiorfiusinnaasunik periarfissaarutsitsiniarnerat, Parisimi isumaqatigiissummut nunatta ilanngutitinneqarneratigut suli sakkortuninngortinneqassaaq, partii allappoq.
Kalaallit Nunaat Parisimut isumaqatigiissummut peqataanngikkaluarluni nunat tamalaat akornanni siuttooreersoq, Vivian Motzfeldtip naqissuserpaa.
- Silaannaap allanngoriartornera uagut pisuussutiginngilarput. Inuit ikittunnguulluta piujuaannartitsinissaq eqqarsaatigalugu annertuumik allannguinikuuvugut. Soorlu erngup nukinganik nukissiorneq assersuutigalugu, taanna oqarpoq.
Isornartorsiuinermut tunngatillugu Sermitsiaq.AG-ip Múte B. Egede oqaaseqartinniarsaraa.