Siumut Nuup saammaateqatigiinneq oqaluuserissallugu qunuginngilaa
Nuummi peqatigiiffiup Ilulissani partiip ataatsimeersuarnerani Saaammaateqatigiinnissamik Isumalioqatigiissitap oqaluuserinissaa siunnersuutigaa
Saammaateqatigiinnissamik isumalioqatigiissitap ukiuni pingasuni sulereerluni tallimanngornermi decembarip 8-ani 2017-imi isumaliutersuutini »Qanga pisut paasivagut - Ullumi pisut akisussaaffigaavut - Siunissaq pitsaanerusoq sulissutigaarput« Naalakkersuisunut tunniuppaa.
Kingorna isumalioqatigiissitaq saammaateqatigiinnissamik isumakkeerfigeqatigiinnissamillu innersuussaqartoq nipangiunneqarlunilu paamaarunneqarsimavoq, aviisi Sermitsiaq allappoq.
Tamannalu Nuummi Siumup immikkoortortaqarfiata uggoraa.
Partiip anguniagassai
– Ukiut pingajuata affaa matuma siorangut isumalioqatigiissitap innersuussutai akorsimasuugutsigit anguniakkat ullumikkut qaninnerusimassagaluarpavut, Inuiattut ullorsiornitsinni Hans Egedep eqqaassutissaata qalipaammik kuineqarneratigut nunasiaataasimaneq pillugu sakkortuumik oqallittoqalernera inuppassuit piareersimaffiginngivillugu, Nuummi Siumup immikkoortortaqarfiani siulittaasoq Inga Dóra G. Markussen Sermitsiamut oqarpoq.
Saammaateqatigiinnissamik isumalioqatigiissitap innersuussutaasa atuutilersinnissaat Ilulissani septembarip 4-aniit 6-anut Siumut nuna tamakkerlugu ataatsimeersualerpat immikkoortortaqarfiup oqaluuserisassanngortinneqartussatut innersuussutigaa.
– Nuummi immikkoortortap taamatut siunnersuuteqarnermini neriuutigaa Saammaateqatigiinnermut isumalioqatigiissitap innersuussutai ukiuni tulliuttuni Siumup partiimi anguniagaannut ilaatinneqassasut. Taamaalilluni partiip anguniagai nutaat 2021-mi Hans Egedep Kalaallit Nunaannut tikinneraniit ukiut 300-nngornerannut tulluassagaluarput, Inga Dóra G. Markussen oqarpoq.
Allaaserineqartoq aviisimi Sermitsiami tamakkiisumik atuarneqarsinnaavoq. Aviisi uani pisiariuk: