Siumut Nuummi siulittaasoq: Oqallinneq pisariaqartoq ingerlanneqaannartariaqarpoq
Illoqarfiit pingaarnersaata kommuniani Hans Egedep eqqaassutissaata inissisimaffia pillugu oqallinneq kommunalbestyrelsep ippassaq naggaserpaa. Oqallinnerli eqqaassutissaannarmut tunnganngilaq, allarpassuarnilli imaqarluni.
Kommuneqarfik Sermersuumi kommunalbestyrelsep Hans Egedep eqqaassutissaata inissisimaffimminit nuunneqassanersoq pillugu oqallinneq maanna naggaserallarpaat. Inuiaqatigiinnili oqallinneq ingerlaqqittariaqartoq, Siumut Nuummi siulittaasoq Inga Dora Markussen isumaqarpoq. Qanga pisimasut pillugit inuiaqatigiit saammaassinissaminnut periarfissinneqartariaqarput.
- Hans Egedep eqqaassutissaa pillugu oqallinnerup takutippaa, inuiaqatigiinni killiffipput, ineriartupiloorsimanerullu nassatai pillugit oqallinnissaq pisariaqartinneqartoq, Inga Dora Markussen Sermitsiaq.AG-mut oqarpoq.
- Qanga pisimasunit suli ikeqartoqarpoq, taakkulu mamitinneqaqqaartariaqarput, oqarpoq.
Nuummi illoqarfiup nutaannginnersaani qaqqajunnami Hans Egedep eqqaassutissaa, ataasiakkaanit assigiinngitsunik isummerfigineqartarnera pissutigalugu, oqallinneq misigissutsinnut inuillu ataasiakkaat isumaannut tunngangaatsiartoq, taassuma erseqqissarpaa. Eqqaassutissaq upperisamut, nunasiaataasimanermut allarluinnarmulluunniit tunngatinneqarsinnaavoq.
- Apeqqut nuna tamakkerlugu eqqartorneqartariaqarpoq. Oqaluttuarisaanerput taassumalu kinguneri pillugit oqaloqatigiinnissamut periarfissinneqartariaqarpugut, Inga Dora Markussen nassuiaavoq.
Taanna isumaqarpoq Kommuneqarfik Sermersuup killiliussaanut, tassa qaammatialunnut killilerlugu oqallinneq sivisussusiliinnarneqarsinnaanngitsoq, aammali erseqqissarlugu oqallinneq kommunip avataani ingerlanneqarsinnaalluartoq.
Saammaasseqatigiinnissamut isumalioqatigiissitaq eqqaamallugu
Saammaasseqatigiinnissamut isumalioqatigiissitap 2017-imi innersuussutaasa ukkatarineqarnerunissaat Inga Dora Markussenip kissaatigaa.
Siumut Nuummi siulittaasoq isumaqarpoq innersuussutit arfineq-marluusut Kalaallit Nunaanni atorluarneqarnerusinnaasut.
- Taamaasilluta killiffipput eqqartornerusinnaavarput, ukiuni 100-ni kingullerni pisimasut, suli annernarsinnaasut aamma eqqartorsinnaavagut, nikeriaqqinnissatsinnullu periarfissilluta, Inga Dora Markussen oqarpoq.
Saammaasseqatigiinnissamut isumalioqatigiissitap innersuusutai arfineq-marluk aajuku:
- Kalaallit Nunaata oqaluttuarisaanera – uagut isitsinnik isigalugu
- Oqaluttuarisaaneq aamma saammaateqatigiinneq pillugit ilisimasanik katersivik
- Saammaateqatigiinnermut aningaasaateqarfik
- Naleqartitat ataatsimoorussat
- Kalaallit oqaasiinik nukittorsaaneq
- Utoqqatsertitsinissamik kissaat
- Kiffaanngissuseqarluni, sioqqutsisumik aamma paasissutissiisumik akuersineq