Siumut Nuummi siulersuisut nutaanik ilaasortaqalertut
Siumup Nuummi immikkoortortaqarfia arfininngornermi 11. september ataatsimeersuarpoq. Ilaasortat 35-it oqallinnermi peqataapput, siulersuisullu nutaanik ilaasortaqalerlutik. Inga Dora G. Markussen siulittaasutut ingerlaqqippoq.
Inga Dora G. Markussen unammillerteqarani Siumut Nuup siulersuisuini siulittaasutut ingerlaqqippoq. Partiip immikkoortortaqarfia arfininngormat 11. september ataatsimeersuarpoq.
Siumut Nuuk Facebookimini ilisimatitsivoq peqataasut 35-iusimasut, ataatsimeersuarnerlu akunnerni sisamani ingerlanneqartoq.
- Peqataasoqarluarnera oqallinnerlu nuannaarutigeqaakka. Peqataasut anngussiffigaatigut kommunalbestyrelsemi illuatungiliuttuunermi ersarinnerusumik nipeqarnissaq ujartorneqartoq. Soorlu kommunalbestyrelsemi sulinermi uparuakkagut suliniutigullu avammut nalunaarutiginerusinnaagigut. Taamaaliorumavugut, Inga Dora G. Markussen Sermitsiaq.AG-mut oqarpoq.
Kommuni tamaat isigalugu
Ataatsimeersuarnermi Siumut Nuup anguniagassai oqaluuserineqarput.
Inga Dora G. Markussen oqaluttuarpoq Nuuk kisiat pinnagu, aammali Kommuneqarfik Sermersooq tamaat isigalugu anguniagassat sammineqarsimasut.
- Kommunimi kiffartuussinerup pitsaanerulernissaa, nunaqarfinni inissaaleqineq, tungiuineq pitsaanerusoq naligiissitaanerlu sammisanut ilaapput, oqarpoq.
Siulersuisuni ilaasortat marluk, Inga Dora G. Markussen aamma Peter Davidsen Kommuneqarfik Sermersuumi kommunalbestyrelsemi ilaasortaapput.
- Siulersuisuunerit nutaat isumalluarfigalugillu tatigilluinnarpakka. Politikkimik suliaqarnermik misilittagaqarluarput. Aamma malugisinnaavarput siulersuisuunerit sulinitsinni tapersersorluassagaatigut, kommunalbestyrelsemi sulinerput nukittunerulerniassammat, Inga Dora G. Markussen oqarpoq.
Aki-Matilda Høegh-Dam siulersuisuni kingullerni siulittaasup tulliusimasoq sassaqqinngilaq, ataataatalu Kim Høegh-Damip siulittaasup tulliatut issiavik maanna ingiffigaa.
Siulersuisuni ilaasortat nutaat arlaqarput.
Siulersuisut nutaat aajuku:
- Inga Dora G. Markussen, siulittaasoq
- Kim Høegh-Dam, siulittaasup tullia
- Nikoline Ziemer, aningaaserisoq
- Mari Laursen, ilaasortaq
- Kirstine Davidsen, ilaasortaq
- Kristina Mørch Kleist, ilaasortaq
- Peter Davidsen, ilaasortaq
- Ulla Larsen, sinniisoq
- Isak Josenius, sinniisoq
- Lars Jørgen Kleist naatsorsuuserisutut toqqarneqarpoq.