Siumut novemberimi ataatsimeersualerpoq
Siumut siulersuisuuneri sapaatip akunnerani matumani ataatsimiinnerminni aalajangerput 27.-29. novemberimi ataatsimeersuartoqassasoq. Partii taamaasilluni siulittaasunngorniuutsitsisussanngorpoq.
Siumut 27.-29. november ataatsimeersuartussanngorpoq. Siumut partiiata allattoqarfiata tamanna Sermitsiaq.AG-mut uppernarsarpaa.
Ataatsimeersuarnermi eqqartugassani pingaarnerit ilagaat siulittaasussamik qinersineq. Pingasullu siulittaasunngorniassallutik nalunaareerput.
- Kim Kielsen
- Vivian Motzfeldt
- Erik Jensen
Sermitsiaq.AG-p paasisai naapertorlugit ataatsimeersuarneq Nuummi ingerlanneqassaaq, tamannali Siumumit uppernarsarneqanngilaq.
Partiimi siulittaasup tulliata aappaa, Evelyn Frederiksen, oqaluttuarpoq ataatsimeersuarnerup qanoq ingerlanissaa pillugu allattoqarfik maanna suligasuartoq. Partiimi aallartitat 65-iupput.
Coronamit unitsitaaqqinnissaq pinngitsoorneqassaaq
Siumut ataatsimeersuarniarnermini arlalitsigut unammillerneqarsimavoq.
Ataatsimeersuarnissaagaluit pingasut pilersaarusiorneqarsimagaluarput, taamaatiinnarneqartarlutilli.
Ullut taamaatinneqartut:
- 8.-10. juli. Ataatsimeersuarnissaq taamaatinneqarpoq coronap ajutoortitsinera pissutigalugu.
- 10. juli. Digitaliusumik ataatsimeersuarnissaq ingerlanneqanngitsoorpoq.
- 4.-5. september. Ataatsimeersuarnissaq isornartorsiorneqareersoq taamaatinneqarpoq. Suliffeqarfiimmi kattuffiillu angalanissatik taamaatissimavaat, angalaqqusinnginneq pillugu, Siumullu aamma taamaasiorpoq.
- Maanna misissorparput qanoq ataatsimiinneq ingerlanneqarsinnaanersoq, ullutsinni pissutsit malillugit maleruaqqusat malillugit, siulittaasup tulliata aappaa Evelyn Frederiksen oqaluttuarpoq.
- Ataatsimeersuarnissaagaluani aporfiusimasut aporfioqqinnginnissaat anguniarparput, oqarpoq.