Siumut naalakkersuisooqatigiinnissamut isumaqatiginninniarnermi peqataajunnaarpoq

Siumut IA-mik naalakkersuisooqatigiinnissamut isumaqatiginninniarnermi peqataajunnaartoq, Múte B. Egede Sermitsiaq.AG-mut ilisimatitsivoq.

Ilimagineqareersutut IA Siumullu naalakkersuisooqatigiittut suleqatigiinnissamut isumaqatigiissinnaasimanngillat. Taamaammat Demokraatit isumaqatiginninniaqataajunnaareersut IA-p Atassut Nalerarlu kisiisa isumaqatiginninniarfigilerpai.

- Ukiuni sisamani tulliuttuni patajaattumik naalakkersuinikkut ingerlatsisoqarnissaata pingaaruteqarnera nalilersimavara. Politikkikkut suliassat immikkuualuttortai suli sammilernatigit oqaatigisariaqarpara, Siumut tusagassiorfitsigut saqqummiunneqartartut malillugit suli eqqissisimaffiunanilu pissaaneqarniuffiusoq. Tamatumunnga pissutaavoq, politikkikkut suleqatigiinnermi pisariaqartinneqartumik eqqissisimasumik Siumut suleqataasinnaanngitsutut nalileratsigu, Múte B. Egede Sermitsiaq.AG-mut ilisimatitsivoq.

Ataqqeqatigiilluni isumaqatiginninniarneq

IA-mi siulittaasup erseqqissaatigaa, Siumumik isumaqatiginninniarneq ataqqeqatigiilluni ajunngitsumillu oqaloqatigiilluni ingerlanneqarsimasoq, Siumulli iluani aaqqiagiinngittoqarnera pissutigalugu IA-p siulittaasuata naggataatigut Erik Jensen tunussimavaa.

Qineqqusaanermi pingaarnertut sammineqartut ilaat: Kuannersuarni aatsitassarsiorniarneq pineqartillugu partiit taakku marluk assigiinngilluinnartunik isumaqarput.

- Tassunga atatillugu assigiinngilluinnartunik isiginninnerput qularutissaanngilaq, Múte B. Egede qinersisoqareersoq ataatsimeeqatigiissimanernut qujassuteqarusuttoq erseqqissaavoq.

Powered by Labrador CMS