isornartorsiuisoqareersoq

Siumut: Naaja Nathanielsen anngaaginnakatappoq

Inuit Ataqatigiinnit Naaja Nathanielsenip isornartorsiuinera Siumup politikkikkut oqaaseqartartuata Karl Kristian Krusep oqaaseqarfigaa

- Isornartorsiuiinnarneq immini aqqutissaanngilaq assaat isaanneqartarput tigusiumannginnerpaajuvorlu Naaja Nathanielsen, Siumup politikkikkut oqaaseqartartuat Karl Kristian Kruse oqarpoq

- Naaja Nathanielsen Siumukkormiut Inatsisartuni ilaasortaatitaai qimmiaraatitut anngaasussiaannartut oqariartornera eqqunngilluinnarpoq tupinnarlunilu.

Siumup politikkikkut oqaaseqartartuat Karl Kristian Kruse tusagassiutinut nalunaaruteqarpoq.

Inuit Ataqatigiinnit Naaja Nathanielsen oqallititsiniaalluni isornartorsiuivoq sisamanngormat. Naaja Nathanielsen ilaatigut ima oqarpoq:

- Naalakkersuisut Inatsisartullu akornanni oqartussaaqataanikkut inissisimanissaagaluaq Naalakkersuisooqqatigiit Inatsisartuni ilaasortaatitaannit suusupagineqarpoq. Inatsisartut ima oqartussaaqataajunnaalersimatigaat Naalakkersuisut qimmiaraattut sungiussipilutsitaasutut inissisimalersimallutik. Paasissutissanik pissarsiniarnissanut, kattuffinnik oqaloqateqarnissanut ataatsimiititalianilu ataatsimiinnissanut illuatungiliuttut kissaateqartarnerat tusaanngitsuusaarneqartarput. Tamanna qasunarpoq, taamatullu innuttaasut oqartussaaqataanerannut aporfissaqartitsilluni.

Naalakkersuisuusimasunut angaaginnartut
- Uanga avataaniik innuttaasut malinnaaneranni qularutiginngilara Siumumi Naalakkersuisuutitavut pisariaqarfiini assut isornartorsiortarlugillu suliakkersorpavut inuiaqatigiit nunarpullu pillugit aamma taamattussaavoq, Karl Kristian Kruse oqarpoq, Naaja Nathanielsenilu anngaakatattuusutut taallugu.

- Isumaqarpungalu imminut (Inuit Ataqatigiit) annertuumik qiviartariaqartoq anngaaginnartuunerat qanoq inuiaqatigiinnut akisutigisimasoq pillugu, IA-mullu taasisartunik qanoq kingunerlutsigisoq.

- Isornartorsiuiinnarneq immini aqqutissaanngilaq assaat isaanneqartarput tigusiumannginnerpaajuvorlu Naaja Nathanielsen, Siumup politikkikkut oqaaseqartartuat oqarpoq. Inuit Ataqatigiit 2009-mit 2013-ip tungaanut naalakkersuisuugallarmata illuatungiliuttunut qanoq ilungersornasimatiginerannik misigisaqarfigisani imaattut saqqummiullugit:

  • Suliluunniit aallartigatik Siumukkut mattutivillugit mattuppaat.
  • Siumumiit ataatsimiititalianut ingerlanniarneqartut tamangajalluinnaasa itigartittarpaat.
  • Siunnersuutitsialassuit tusaajumaneqarneq ajorput.
Powered by Labrador CMS