2015-imut aningaasanut inatsit
Siumut: Makku angusaraavut
Sanaartornerup nunanut tamarmut siammarsarneqarnissaa, tassa aningaasanut inatsimmi nutaami inuiaqatigiinnut pingaarutillit ilaannut assersuutissatut, Siumup gruppiani siulittaasup politikkikkullu oqaaseqartartup erseqqissaatigisaat
Annonce
Siumup gruppiani siulittaasup Jens Immanuelsenip politikkikkullu oqaaseqartartup Jens Svane-p 2015-imut Aningaasanut Inatsit nutaaq naammagisimaarpaat.
– Inatsisissap suliarineqarnissaa pingaartillugu suleqataaffigaarput. Isumaqarpugullu inatsisissaq isumalluarnartumik anguniakkatsinnillu isumaqatigiissutaasunik piviusunngortitsinissanut tunngaviliilluartussamik aningaasanut inatsisiliorluta, taakkua tikkuaapput, aningaasanullu inatsimmi assersuutissanik arlalinnik, innuttaasut iluaqutissaattut isumaqarfigisatik, tikkuarlugit:
- Inuussutissarsiornikkut, aalisarnikkut takornariaqarnikkullu periarfissaasut pitsanngorsarnissaat. Sanaartornikkut periarfissiissutaasut nunatsinnut tamarmut siammaanerunissamik siunniussaqarnerup aallarteqqinnera.
- Angallannikkut nutaamik aaqqissuusseqqinneq aallartissammat.
- Akileraartarnikkut ineqarnikkullu atugassarititaasut aaqqissuuteqqinneqarnissaannut sulinerup aallartinnissaa. Tamatumalu malitsigisaanik aamma utoqqalinersiat siusinaartumillu sulisinnaajunnaarnersiuteqarnerit aaqqissuuteqqinneqarnissaat.
- Great Greennland-ip aningaasaliiffigineqaqqinneratigut aalisarnikkut annerusumik isumalluuteqqanngittunut isertitaqarsinnaanerup qulakkeerneqarnera.
- Inuusuttorpassuit suliffissaaleqisut nunatta ingerlatitaanerani sakkussagut annerusumik “sakkussaqalernissaat” siunertaralugu aningaasanik amerlanerusunik immikkoortitsivigineqarnerat.
- Ilaqutariinnut atugassarititaasut pitsanngorsarnissaannut suliat aallartinnissaat.
- Sanaartornikkut periarfissiissutaasut nunatsinnut tamarmut siammarteqqinneqarne-risa aallarteqqinnerat.
- Kommuuninik iluarsaaqqinnerup nutaamik naliliiffigineqarnissaata suliniutigineqalernera.
- Meeqqat atuarfiata naliliiffiginissaa, aningaasalersorneqarneratalu aaqqissuusiffigineqarnissaata suliarilernissaat, Jens Immanuelsen Jess Svane-lu tikkuaapput, politikkikkullu anguniakkat allat maanna aallartinneqarsinnaalersut taallugit, soorlu nunatta Danmarkillu akornanni aningaasat ingerlaartarnerisa qulaajaaffigineqarnissaat. Siumukkormiullu 2016-imut aningaasanut inatsisissap suliarineqalernissaa, qanittuararsuakkut aallartinneqartussatut naatsorsuutigineqartoq, qilanaaraat.